Nongstoiñ, Lber, 21: Ka jingdon jong ka surok PMGSY na Langja shaduh Athiabri ka la long ka jingkyrkhu kaba khraw ïa paitbah nongshong shnong jong ka thaiñ West Khasi Hills District hynrei kumba ka long ha kine ki sngi ka la idonkam haduh katta katta ban pynheh noh khnang ba kan pynsuk ïa ki paitbah ha ka leit ka wan bad ha ka rah ka rong.
U President jong ka Synjuk Nongsynshar Shnong Jyrngam Sirdarship (SNSJS) Bah K. Mawlieh bad u Secretary Bah B.Nonglang haba iakren bad u Mawphor ki la ong ba ïa kane ka surok kaba jngai kumba 16 kilomitar ladep siangrong haduh Athiabari hynrei katkum ka jingïaid ka por ki kali ki la nang bun hynrei ka surok pat ka long kaba rit palat kumta ka buh jingeh bha ïa ki paitbah nongleit nongwan khmtam ïa ki kali kiba kit jingkit kiba ïaid manla ka sngi
Ki la ong ruh ba kane ka thaiñ ka dei kaba pynmih bun eh ïa u sying, u synsar bad kiwei kiwei ki mar rep ba ki kali ki ju leit kit sha Nongstoiñ bad shaduh Shillong kumta ka la idon kam haduh katta katta ban pynheh shuhshuh ia ka surok.
Ha kajuh ka por ki nongïalam jong ka Synjuk ki la ong ruh ba na ka bynta ka jingmyntoi bad ban pynsuk ïa ki kali kiba kit ïa ki mar rep kumjuh ruh ïa ki nongleit nongwan kin sa pyrshang ban leit ban ïakynduh ïa u Supritendent Engineer ka tnad PWD ban kyrpad ba un pynsgew sha ka Sorkar Jylla ba kan mang pisa biang na ka bynta ban pynhehshuh shuh ïa ka surok.
Ki nongïalam jong ka synjuk ki la ong ruh ba u kwai, ka kait bad u sying ki dei kiwei pat ki mar rep ba ki paitbah jong ka thaiñ ki hap ban kit sha Hahim bad Boko da kaba ïaid lyngba katei ka surok bad namar ka dei kaba rit bad kyllaiñ bha ka shem jingeh bha ha ka por lyiur kumta ka la idon kam bha ba ka surok kan kham kylluid khnag ban lait na kino kino ki jingïatyngkhuh kali kaba lah ban wanrah ïa ka jingmynsaw.
Shuh shuh ki la ong ba lada ka surok naduh Langja haduh Athiabari ka dei kaba kham kylluid kan long ka jingkyrkhu kaba khraw ïa ki paitbah.
