Dawa ka Seng ki nongkhaïi dewiong ka jylla na ka sorkar ban pynlait noh ïa ki Challan Dewiong ba la dep Lilam

Nongpoh, Nohprah 06: Ka Meghalaya People Coal Trader Welfare Organization (MPCTWO) mynta ka sngi ka la mih pyrthei ban kyrpad na ka sorkar jylla ba ka dei ban pynlait noh ïa ki Challan jong u Dewiong ba la dep ban lilam (Auction) naduh u bnai Jymmang 2023 haduh mynta u bnai Naiwieng 2023, kaba dei halor ka jingkam ba bun ki nongkhaïi Dewiong ki la angnud ba ka sorkar jylla kan pynlait noh ïa ki Challan khnang ba kin ioh ban shalan ne die noh ïa u dewiong kum kita ki nongkhaïing dewiong ha ka jylla.
Katkum ka kyrwoh ba la pynlait da u President ka Meghalaya People Coal Trader Welfare Organization (MPCTWO), u Bah John Frankie Rymbai, u la ong ba ka seng ki nongkhaïi Dewiong ki la angnud shisha ba ka sorkar kan pynlait ïa ka Challan bad khamtam ba la poi sha ka por jong ka jinglehkmen bapher bapher ha kaba ki nongkhaïi ki la pynpaw sha ka seng ba la dei ba ka sorkar kan pynlait noh ïa ki Challan khnang ba kin lah ban shalan ne die ïa u dewiong sha ki bynta bapher bapher da kaba pyndonakam da ki Challan ne ki Bill ba ki ioh na ka sorkar jylla.
U la pynpaw ruh da kaba ka sorkar kan pynlait ïa ki Challan, kane kan ïarap ïa ki nongkhaïi Dewiong ba kin lah ban shalan ïa u dewiong sha ki bynta bapher bapher ka ri India da kaba pyndonkam hok ïa ki Challan bad ki Bill ba la ioh na ka sorkar, khnang ba kane ruh kan nym pynduhnong ïa ka sorkar ba kan ioh lum ïa ka khajna kumba ka dei ban long. U la ban khia ruh da kaba ong, ba lada ym don kata jingtehlakam na ka sorakr ban shalan ïa u Diewiong katkum ki kyndon ba dei ban leh da ka sorkar, kane kan ïalam ruh sha ka jingduhnong kaba khraw ïa ka sorkar halor ka jingiohlum khajna ha ki khyrdop ba la buh da ka sorkar bad ka long ruh kum ka jingpynshlur ban khaïi tuh ïa u Dewiong lada khlem da bud katkum ki kyndon ba la buh da ka sorkar.
Shuh shuh, ha katei ka kyrwoh, u la pynpaw ruh lada ka sorkar ka lah ban leh katkum ki kyndon ha ka jingshalan ïa u dewioing, kane kane kan ai jingmyntoi ïa ki nongkhaïi Dewiong hapoh ka jylla bad ka jingmyntoi ruh ka leit sha ka sorkar ban ioh lum ïa ka Khajna khamtam ba ka jylla jongngi ka don ha ka bynta jong ka jinghiar ka ioh ka kot, u la bynrap.