Dawa ka NESO ba dei banpynshitom ïa ki bor pahara kiba thombor ïa ki paidbah ha Oting

By Mawphor Editor On Sep 24, 2024

Shillong, Nailur 23 : Ka North East Students Organisation (NESO) ha ka sngi Nyngkong ka la dawa na ka Sorkar Pdeng ba kan pynshitom ïa ki bor pahara jong ka 21 Para (SF) kiba donkti ha ki kam bymman bad kam thombor ha Oting khnang ban pynïoh ïa ka hok sha ki lanot abd sha ki bahaiing ha sem jong ki.
“Ngi pynkynmaw biang ruh ïa ka jingdawa kaba la slem bha jong ngi na ka bynta ka pyndam noh syndon ïa ka aiñ ïakjakor AFSPA ha ka thain shatei lam-mihngi, kane ain kam don jaka ha ka synshar paidbah. Ka jingbym lah ban leh kumta kan pynjur shuh ïa ka jingbym shaniah bad ka jingshah thombor ha ka thaiñ,” ong u Chairman ka NESO u Samuel B Jyrwa ha ka kyrwoh.
La ïathuh ruh ba ka jingmih jong ka seng ban kadei hadien ka rai ba dang shen da ka Supreme Court jong ka Ri India ha kaba ïadei bad ka jingshah thombor ki jingim briew ha Oting ha u Nohprah 2021 ha ka Mon District, Nagaland ha kaba ki bor pahara jong ka 21 Para (SF) jong ka Indian Army ki la thombor ïa ka jingim jong ki 14 ngut ki nongshong shnong ba lui lui.
Ka kyrwoh ka ong ruh ba wat hapdeng ki sakhi kiba bun bha kiba la lap da ka kynhun tohkit ba kyrpang (SIT), hynrei ka ïingbishar ba ha khlieh duh, ha ka 17 tarik u Nailur ka la pynwai noh ïa baroh ki jingbishar ïa ki shipai ba shah kynnoh.
“Kane ka rai ka dei ka jingkyntait ïa ka ka hok jong ki lanot bad ki bahaiing jong ki, kiba la ap ïa ka jingbishar ba hok. Ka SIT, kaba la thaw da ka Sorkar Nagaland, ka la pynlong ïa ka jingtohkit kaba bniah, ka pyni ïa ki sakhi kiba bun bha ba
la pynngat ïa 30 ngut ki briew jong ka 21 Para (SF), kynthup ïa ki ophisar ba rangbah, ha ki jingpynïap Oting. Ïa ka chargesheet la ai sha ka ka District bad Session Court jong ka Mon, hynrei ka Sorkar Pdeng ka la kyntait ban ai jingbit ïa ka jingshah pynngat jong ki,” bynrap biang ka kyrwoh.
U Bah Samuel u la pyntip ba man ka por, ka NESO bad ki kynhun jong ka ki la dawa ban pynduh noh ïa ka AFSPA, ka aiñ kaba dang ïai bteng ban pynneh pynsah ïa ka ka jingleh donbor, ka jingshah pynshitom, bad ka jingpynkheiñ hok longbriew manbriew kaba jur ha kylleng ka thaiñ Shatei Lam Mihngi.
Ka kyrwoh ka ong ruh ba kumno ka jingjïa ha Oting ka pyni ïa ka jingjia ba sngewsih kaba ka AFSPA ka lah ban wanrah khlem da don kano kano ka jingkitkhlieh.