Mairang, Naitung 1: U Superintendent of Police Eastern West Khasi Hills District u Bah Dangsan Khyriem MPS, u la pyntip ba mynta ka sngi hat majai la rah sha Ïingbishar ïa u Roberto Marngar 25 snem ka karta, u ba na ka shnong Nongshyiap Jaraiñ, u ba la ot pdot ïa ka samla Phyrnailin Khasyntiew 27 snem ka karta, ha ka parking lot kaba don ha ka shnong Pyndengumiong Mairang ha ka janmiet sngi nyngkong.
Ka kyrwoh khubor na u SP ka ong ba ka daw ba u Roberto u la ot pdot ïa ka Phyrnailin Kharsyntiew, ka dei namar kam kwah shuh ban dang bteng ïa ka jingïaïaid samla bad u, ha kaba ka la kwah ban pynkut noh ïa ka jingïadei hapdeng jong ki. Hynrei, ha ka sngi nyngkong katba ka dang ïaid bad u kpa jong ka, une u briew u ba la thmu sniew lypa, u la tur shajan jong ka bad ot ïa ka na pdot da ka tari ba ju pyndonkam ha ïing.
Hadien ka jingjia, ki riew paidbah ryngkat ki VDP jong ka shnong Pyndengumiong, ki la ïarap ban pynkit ïa ka Phyrnailin sha Civil Hospital Mairang. Hynrei ka la khlad noh pynban namar ka jingjur palat ka jingmynsaw.
Na ka liang ki riew paidbah bad ki VDP ki la ïoh bat ruh ïa u runar bad la aiti sha ki pulit. Halor kane ka jingjia, ki pulit ki la register case ha Mairang Police Out Post bad ki la pynngat ha ka kyndon 103 sub section (1) jong ka BNS. Ki pulit ki dang ap ruh ïa ka kaiphod post mortem bad ka jingtohkit ka la ïaid shakhmat.
Haba ïoh ban ïakren bad u kpa jong ka samla lyngba ka phone, u la ïathuh ïa kaei kaba la jia ha ka janmiet jong ka 30 tarik u Jylliew ha Pyndengumiong Mairang. Haba ïakren u la ïathuh ba ka khun jong u kaba sah ha ka shnong Mawkhapkhwa, ka ïalang bad u briew u ba na Shyiap Jaraiñ bad ka la ïathuh ha u kpa, ba ka kwah ïa khlad noh bad u hynrei la ong ba u la pyneh bad ka khun jong u ka la sheptieng.
Hynrei, ha ka 30 tarik kaba dei ka sngi iew Mairang, u la ong ba ka khun ka kyrpad ïa u kpa ba un pynkren lem ïa u ta u briew. La ong ba ha ka jingïakynduh lang ha Mairang bad katba ki dang ïaid lynti ban ïakren kham ha pajih, u kpa u ïaid nakhmat, ka khun jong u ka bud nadien bad uta u briew pat u bud nadien jong ka khun.
Related Posts
Hynrei katba dang ïaid lynti u la ong ba uta u briew u la kynrup kynsan nadien bad ka khun jong u ka kyllon ha madan. Ha kata ka por u la kren ïa uta u briew ba ym dei ban leh kumne da ka kti bad ban ïa kren da ka ktien. Hynrei ki don kiba ïathuh ha u ba ka khun ka la mih snam, kumta u la leit sha ka khun bad ïa uta u briew la bat noh da ki paidbah.
U la ïohi ba ka mih snam na ryndang hynrei ka dang lah ban ïaid kjat kumba shiphew mitar eiei sha kali. Hynrei haba la poi ha Sangshong ka la phlei snam kynsan bad ka dkut mynsiem noh. U kpa u la ong ba hadien ba la peit bha la ithuh ba u la ot da ka tari na u pdot jong ka.
Shuh shuh, ki khubor ba la ïohlum ba mynta ka sngi, la ong ba ïa ka met ba dang sah jong ka Phyrnailin Kharsyntiew, kaba la khlad noh na ka jingshah ot pdot ha ka sngi nyngkong, la pynkit noh mynta ka sngi sha NEIGRIHMS Shillong ban leh ïa ka post mortem. Ha ka por janmiet pat la pynkit biang noh sha ka shnong ba ka shong ka sah.
Na ka liang ka kur Kharsyntiew Central Body lyngba u Secretary Bah Alfondbirth Kharsyntiew ryngkat u President ka Kur Kharsyntiew Mairang Unit, ki la pynpaw ïa ka jingpynrem jur halor kane ka jingjia shah ot pdot jong ka samla Phyrnailin Kharsyntiew ha la u samla haduh ba kan da khlad noh.
U Bah A.Kharsyntiew u la ong ba kane ka rukom pynïap ka dei ka sien kaba nyngkong ba kan jia ha ka kur. U la kyntu ïa ki bor jong ka aiñ ban pynshitom da kaba tyngeh ïa utei u briew, watla ka dei ban hap rai sdien phasi ruh.
U Bah Alfond u la ong ruh ba haba kiba kum kine ki briew kim kwah ïa kiwei ba kin im, ym dei ïa kiba kum kine ki briew ruh ba kin im.