Dawa ka KSU ïa ka Sorkar Jylla ban pynshna pynstet ïa ka DREAM draft policy
![](https://mawphor.com/wp-content/uploads/2023/08/Deputy-C-EJH.jpg.jpg)
Shillong, Nailar, 11: Ka Khasi Students Union (KSU) East Jaiñtia Hills District Unit ha ka sngi Thohdieng ka la dawa ïa ka Sorkar Meghalaya Democratic Alliance (MDA) ba kan pynstet ban shna ïa ka Drug Reduction Elimination and Action Mission (DREAM) Draft Policy.
Ka seng kaba la buh hakhmat ïa ka thong ban ïakhun pyrshah ïa ka jingjyllei shaba palat jong u drok hapoh ka East Jaiñtia Hills District bad ha ka jylla Meghalaya baroh kawei ka la aiti da ka dorkhas ha u Deputy Commissioner jong ka East Jaiñtia Hills District u Abhilash Baranwal kaba kynthup ïa ki jingai jingmut kumno ban ïada ïa ki khynnah bad ïa ki samla na u drok.
Ka East Jaiñtia Hills District ka dei kawei na ki distrik kaba jur bha ka jingkynrei bad jingwan tuid jong u drok na shabar.
Ha ka jingïakynduh ïa u Deputy Commissioner, ka seng ka la ai jingmut ba la dei ban pynjur ïa ka jingai jingpynshai halor ka jingma jong u drok sha ki skul khnang ba ki khynnah rit bad ki samla kiba dang khie dang san kin kiar na u drok. Ka seng ka la ai jingmut ïa u DC ban khot da ka jingïalang ïa baroh ki kynhun bapher bapher ban ïamir jingmut bad pynurlong ïa kane ka thong.
Ka seng ka la ai jingmut ruh ba dei ban pynsdang noh ïa ki jingai jingpynshai (awareness program) ha manla ki skul kiba don hapoh ka district manla ka step shwa ban long skul.
Ka Seng ka la kyntu ruh ïa ki bor synshar District ban pynkhlaiñ shuh shuh ïa ki bor pahara bad ba ka tnat Pulit kan ïatrei lang ryngkat bad ki Seng Samla Shnong, ki Dorbar Shnong khnang ban pynduh jait ïa ka jingjyllei jong u drok.
“Na ka liang u Deputy Commissioner u la pdiang ïa ka jingïatreilang bad shen un sa wad shuh shuh ïa ki lad ki lynti kumno ban ïada ïa ki khun samla na u drok,” la pyntip ka seng ha u kyrwoh ba la phah sha ki lad pathai khubor.
Ban ïoh ïa ka jingïatreilang jong ki Dorbar Shnong, ka seng ka la pynpaw ruh ba kan sa ïakren ruh bad ki Dorbar Shnong bad ban jied ïa ki shnong ban buh ïa ka Community Gym kaba long kum shi bynta ka sienjam ban pynkiar ïa ki samla na u drok. “Ka Community Gym kan long ba ki tiar ïalehkai ki dei ban don ha manla ki shnong bad ka seng kan sa ïakren bad ki Sports Club jong ki shnong ban wad ïa ka iing bad jaka ban buh ïa tiar ïalehkai,” la pyntip ka seng.
Kane ka seinjam kan ïarap ïa ki khun samla ban pynleit jingmut ha kaba kilan met bad ban pynklet ïa ki ban ngop ha ki jingsniew ba bun rukom, la bynrap ka KSU.
Ka Seng ka la ai jingmut ruh ban buh ki “De-addiction After Care Rehabilitation Centre” bad ka seng ka la pyntip ba kan sa shimti ban wad jaka bad ban pynsngewthuh sha ïa ki shnong ban pdiang ïa kane ka jingtyrwa.
Shuh shuh ka KSU ka la kyntu ruh ba ki paidbah kin ïatreilang ryngkat bad ka Sorkar Jylla lem bad ka seng ban rat dyngkhong ïa u drok bad ban ym khim jingmut ne tieng haba wan ki jingbha bad ki jingkylla.