Shillong, Jylliew, 20: Ka Khasi Students Union (KSU) East Jaiñtia Hills District ka la aiti da ka dorkhas ha ka Director General of Police (DGP) ka jylla ka Kong Idashisha Nongrang da kaba ban weng noh ïa ka khyrdop Check-Gate jong ki shipai BSF ha jingkieng Sonapyrdi, East Jaiñtia Hills District.
Ha ka jingïakren bad ki lad pathai khubor, u General Secretary ka KSU-EJH samla KS Suchiang u la ong, ba ka don jong ki shipai BSF ha shilynter ka surokbah NH-6 ka long kaba beaiñ namarba ka jingthmu ka long ba ki shipai BSF ki dei ban ïada ïa u pud u sam bad ban khanglada ïa ka jingwanrung kyrthep jong ki mynder na ka ri Bangladesh sha India.
Ha ka dorkhas, ka seng ka la pyntip ruh ba ki shipai ki shu shong jubor ha ka jaka jong ki riewshimet nalor ba pyndik ruh ïa ki paidbah na ka por sha ka por.
Ka seng ka la kyrpad ïa ka heh Pulit jong ka Jylla ban weng noh mardor ïa ki shipai BSF kiba buh ïa ka Check post ha jingkieng Sonapyrdi, ha ka shnong Dona Umbluh bad ha Ratacherra.
Halor kine ki jingjia, ka KSU ka la ïathuh ba ki la don jingujor sha u Deputy Commisioner bad sha u Superintendent of Police jong ka East Jaiñtia Hills District hynrei kam poi shano shano bad kum ka seng ka don ïa ka jingsngewsyier na kane ka jingleh klumar jong ki BSF ha ka thaiñ khamtam ïa ki paidbah kiba shong ba sah ha shnong Sonapur, Rattacherra bad Hingaria.
Ka KSU ka la kyntu ruh ïa ka DGP ban buh shuh shuh ïa ka jaka talasi mynder ne ka Anti-Infiltration Check Gate ha ka shnong Tongseng khnang ban tehlakam ïa ka jingwan rung kyrthep beaiñ jong ki mynder na ka ri Bangladesh sha ki karkhana pynmih dewbilat kiba don ha East Jaiñtia Hills District namarba ka Anti-Infiltration Check Gate kaba don ha Umtyra kam lah satia ban tehlakam ïa ka jingwan rung jong ki mynder ri.
Ka Seng ka la kyrpad ruh ban buh ïa ka tnat jong ki Pulit pynïaid kali ha East Jaiñtia Hills khnang ban weng ïa ka jingdheng kali.
