Nongstoiñ, Naitung 18: Ka KSU Ri Muliang Circle hapoh ka jingïalam jong u Samla Biangboy Sangriang president bad u samla Dominic Kharmaw, ha ryngkat ka jingsynran lang jong u Samla Armstrong Sohshang Assistant General Secretary KSU West Khasi Hills District, ka la kiew sha Shillong ban ïakynduh ïa ka Chairman jong ka Meghalaya Rural Bank (MRB), ban dawa buh ïa katei ka tnad jong katei ka bank hapoh Nonglang kaba hap hapoh Ri Muliang Block West Khasi Hills.
Na ka liang jong ka Chairman jong katei ka bank ka la bthah ïa ki nongïalam jong ka seng ban ïakynduh ïa u Regional Manager jong ka Meghalaya Rural Bank u ba dei peit ïa ka West Khasi Hills. Kumta hynne ka sngi ka 18 tarik, ka la ïakynduh ïa utei u Regional Manager hapoh Nongstoiñ.
Ha jingïakynduh bad utei u khlieh jong ka West Khasi Hills, u la ong ba katkum ka jaka ka thaiñ Ri Muliang, ka la dei hok ban don noh ka bank ha katei ka jaka bad u la kular ban sa leit jurip ïa katei ka thaiñ shwa ban buh ïa katei ka bank ha kine ki taiew ban wan.
Kumban shu pynkynmaw ba ka thaiñ Ri Muliang ka dei ka thaiñ kaba dang sahdien ha baroh ki liang bad ka bank kaba jan tam ka dei hapoh Seiñduli, kaba jngai kumba 35 haduh 45 kilo meter bad ki paitbah ki shem jingeh shibun eh na ka bynta ban leit donkam ha ki bank.
Namar ka jingsahdien ha ka thaiñ baroh kawei, ka Sorkar MDA 1 ha u snem ba la dep kata ha ka 22 tarik Naiwieng 2022, ka la plie ïa ka C&RD Block ha ka shnong Nonglang West Khasi Hills na ka bynta ban wanrah ïa ka roi ka par hapoh ka thaiñ.
