Dawa ka KHNAM ban pynduh noh ïa ka Personal Interview ha ki kyrdan barit
Ban lait ka jingtuklar na kiba don ha ka bor
![](https://mawphor.com/wp-content/uploads/2022/10/Screenshot_20221025-232716.jpg)
Shillong, Risaw, 25: Ka Khun Hynñiewtrep National Awakening Movement (KHNAM) State Youth Wing ha ka sngi Baar ka la aiti da ka dorkhas ha u Myntri Rangbah ka Jylla u Conrad Kongkal Sangma halor ka jingdawa ba dei ban pynduh noh ïa ka “personal interview’ na ka bynta ka kyrdan Group B, C bad D khnang ba kan ym don shuh kano kano ka jingleh shiliang ha kaba ïadei bad thungkam ka thungjam ha ki tnat treikam ka Sorkar Jylla.
Ha ka jingïakren bad ki lad pathai khubor u President ka KHNAM-State Youth Wing u Bah Thomas Passah u la ong, ba ka Sorkar India bad ki 25 tylli ki Jylla hapoh ka ri India ki ladep ban pynduh noh ïa ka personal interview na ka bynta ka post Group B,C bad D naduh u snem 2016 hynrei dei tang ha ka Jylla Meghalaya ba ka Sorkar kam pat lah ban leh eiei halor kane.
“Dei na kata ka daw ba ngi la wan aiti da ka jingthoh ha u Myntri Rangbah ban dawa ïa ka Sorkar Jylla ba ka dei ban pynduh noh ïa ka jingpynlong Personal Interview ha ki tnat treikam ka Sorkar. Ka jingkhot ïa ka personal interview ka dei tang ka lynti lane ka kabu ïa ki longheh longhaiñ bad ki Myntri Sorkar ban ïoh tuklar ha ka jingïohkam Sorkar khnang ban ïoh jingmyntoi ha ka saiñpyrthei,” ong u Bah Passah.
U la ong ruh ba ki samla wadkam kiba dei hok ban ïoh ïa ka kam kim ïoh satia namarba kim ithuh ïa ki briew kiba don ha ka bor. “Ka la poi ruh ka bynta ba shwa ban thep kam Sorkar, ki samla ki hap ban pyrkhat shwa la ki don neem kino kino ki briew kiba don ha ka bor kiba lah ban ïarap ïa ki,” u la ong.
“Kumta ban rat dyngkhong ïa kane ka jingthungkam buhrieh lane ka jingthungkam sop sop jong ki bor ki bahalor, ngi dawa jur ïa ka Sorkar Jylla ba ka dei ban pynduh noh ïa ka jingpynlong ïa ka personal interview bad ban pynïaid shakhmat ïa ka jingthungkam tang da kaba peit na ka Written Test haba shim rai ban thungkam,” la bynrap u Bah Passah.
“Lada ka Sorkar ka leh kumta ka mut ba ka Sorkar kan lah ban kunai wat ïa ka pla pisa lajong, namarba ka don ka jingpynlut phut haba pynlong ïa ka personal interview,” u la bynrap.