Dawa ka JSM ban shna ïa ka Govt. College ha EJH na ka CSR ba ju ïarap ki Karkhana

Khliehriat, Lber, 07: Ka Jaiñtia Students Movement (JSM) hapoh ka jingïalam u President Bah Leningstar Rymbai ha ka sngi Thohdieng ka la aiti da ka jingthoh ha u Deputy Commissioner ka East Jaiñtia Hills District ban pynpoi sha u Myntri ka tnat Pule Puthi ka Sorkar Jylla u Rakam A. Sangma ha kaba ïadei bad ka jingdawa ban tei ïa kawei ka Kolej Sorkar ha East Jaiñtia Hills District.
Ha ka shithi, ka JSM ka la kyntu ïa u Rakam Sangma ba un bthah ïa u Deputy Commissioner jong ka East Jaiñtia Hills District ban ïakren bad pynkohnguh ïa ki karkhana saiñ dewïong bad ki karkha pynmih dewbilat kiba don hapoh u pud u sam jong ka East Jaiñtia Hills District ki dei ban noh synniang lyngba ka Corporation Social Responsibility (CSR) khnang ban ïoh tei ïa ka Kolej Sorkar hapoh ka distrik namarba kane ka kam ka la long kaba i donkam kyrkieh bha.
Ka seng ka la pynkynmaw biang ba ka Sorkar Jylla ka ladep ban shim ïa ka rai ha ka 24 tarik, Kyllalyngkot 2025 ba kan buh noh ïa kawei ka Kolej Sorkar ha East Jaiñtia Hills District bad ha West Khasi Hills District.
“Ngi ai ka jingïaroh halor kane ka jingshim rai namar ka JSM ka ladep ban dawa ïa kane naduh u snem 2015 bad ka la pynher ruh bun tylli ki dorkhas sha ka Sorkar bad mynta ka kynti ruh ka seng ka la phah ïa ka dorkhas sha u Symbud Myntri Rangbah Bah Sniawbhalang Dhar kum ka jingpyntip hadien ba ngi ladep ban phah dorkhas naduh ka 14 tarik, Nailur, 2023,” la ong ka dorkhas na ka Seng.
“Ha rilum Jaiñtia hi baroh kawei ka dang don mynta tang ka Kiang Nangbah Govt College bad kane ruh ka don ha Jowai, West Jaiñtia Hills District. Ka Kolej ka la long kaba khapngiah haduh katta katta namar ka jingbun ki samla pule na baroh kawei ka rilum Jaiñtia bad kane lehse ka lah ban wanrah ïa ka jingbym bit bym biang shuh ha ka rukom ai jinghikai. Ki samla pule na East Jaiñtia Hills District kiba pule ha Kiang Nangbah Govt College ne ha kano kano ka College ha Jowai ki hap ban pynlut shuh shuh sa ka bai leit bai wan, ka baiwai ïing lada ki sah ha Jowai. Kane ka la ktah ïa ka jinglut jingsep,” pynpaw ka JSM ha ka shithi sha u Rakam Sangma.
Ka seng ka la pynpaw ruh ba ka long kaba kloi ban ai ka jingïatreilang bad ka Sorkar ha kaba ïadei bad kane ka jingdawa ba donkam ban don ka Kolej Sorkar ha East Jaiñtia Hills District bad ban ïadon bynta lang ha ki jingïalang bad kan ai ruh ka jingkyrshan bad kan ïarap ban pynïoh ruh ïa ka jaka ban shna ïa ka College hapoh East Jaiñtia Hills District.