Dawa ka JNC-NC ban bujli noh mardor ïa ki post elektrik kiba la sarang ha Moolasngi

Khliehriat nailar 28: Ka Jaiñtia National Council Nongkhlieh Circle hapoh ka jingïalam u President, u bah Nikki Sutnga ka leit ban ujor ha ophis treikam jong u SDO jong ka tnat MePDCL Khliehriat Division, halor ka jingsarang uwei u post electrict uba lah ban hap bad kyllon ha kano kano ka por, uba don ha ka shnong Moolasngi, na ka liang ka seng ka dawa jur na ka tnat bor ding ba ka dei ban leit ban bujli noh ïa utei u post ba buh jingma ïa ka jingim briew.
La ong ba ka jingbam sarang utei u post electric ka buh jingma haduh katta katta ïa ki briew nongleit nongwan, ka seng ka kyntu jur ruh ïa kito kiba dei ban peit ïa kane ka kam ba ki dei ban leit peit bad leit jurip khnang ïa kum kine ki post kiba la rim bad kiba la slem kiba la i donkam ban kylliang noh khnang ban lait na kano kano ka jing jia ba sngewsih, ka seng ka ong ruh ba ka tnat kam dei ban leh ïa ka kam ba dei ban leh ynda la dep jia kaei kaei kaba sniew, hynrei dei ban shim khia noh mardor ban leh ïa kaba donkam namar dei ban buh shwa ïaka jingim ba kordor hakhmat eh.
Ha kaba ïadei bad katei ka kam ka seng ka dawa ruh ba dei ban buh shuh ïa ki post electric sha katei ka thaiñ Elaka Nongkhlieh, namar dang don bun ki jaka ki bym pat don post electrict bad kane ka wanrah jingeh ïa ki paidbah nongshong khamtam ha kine ki sngi ba ka jingioh bor ding ka long kaba donkam, pynkut u kyrwoh na ka seng.