Shillong, Ïaïong 16: Ka Jaiñtia National Council (JNC) Western Zone ka la dawa na ka Jaiñtia Hills Autonomous District Council (JHADC) ba kadei ban weng mardor ïa u Rangbah shnong na ka jaitbynriew Karbi hapoh ka shnong Lakaroi da kaba kynnoh ba la thung beaiñ da ka sorkar Assam.
Ki nongïalam ka JNC ba la ïalam da u President ka western zone u Bah Hamehi Bamon ki la kynduh ïa u CEM ka JHADC u Bah Thombor Shiwat bad ki la kyrpad ïa u ban shim kam mardor pyrshah ïa ka jingtuklar jong ka Assam hapoh u pud u sam ka council.
Ka shnong Lakaroi ka dang hab hapoh u pud u sam jong ka Dorbar Pyllun Lapangap kaba ha West Jaiñtia Hills District.
U Bah Bamon u la kynnoh ba bun na ki dkhot ba kongsan bad ki nongshong shnong ha Lakaroi ki dei ki jaitbynriew riewlum Karbi ha kaba la ïoh jingtip ba ki la aiti ïa ki kot ki sla sha ka Assam khlem ka jingtip bad mynjur ka JHADC.
“Ngi la kyntu ïa u CEM ban shim kam mardor da kaba phah ïa ki nongmihkhmat sha kane ka shnong bad ba dei ban wengnoh ïa une u rangbah shnong, naba ka shnong jong ki, kam hap sha Assam, bad kim don ka bor ruh ban wan tuklar sha ka khyndew ka shyiap jong ngi,” u la bynrap.
“Haba jubab, u CEM u la pynthikna ïa ka seng bad un sa shim khia mardor pyrshah ïa ka jingpynkheiñ ïa ki kyndon ka JHADC,” ïathuh u Bah Bamon. U la maham ruh ba lada ka JHADC kam shim kam halor kane ka bynta, ka JNC kan ym shong kli kti.
