Dawa ka JNC ban pynsangeh ïa ka Public Hearing ka Meghalaya Cement bad Green Valley

Khliehriat, Nailar, 07: Ka Jaiñtia National Council (JNC), ha ka sngi Palei ka la leit aiti da ka jingthoh ha u Deputy Commissioner jong ka East Jaiñtia Hills District ban dawa ba u dei ban pynsangeh shwa ïa ka jingthmu jong ki ar tylli ki karkhana pynmih dewbilat, kata, ka M/s Meghalaya Cement Ltd bad ka Green Valley Industries Ltd. kiba thmu ban pynlong ïa ka Public Hearing ha ka 24 tarik bad ha ka 25 tarik mynta u bnai.
Ha ka shithi ba la soi da u President jong ka JNC u Bah Sambormi Lyngdoh bad u Secretary u Bah Wanshwa Suting, ki la pynpawa ba watla kine ki kompeni ki la ïoh ïa ka jingmynjur na ka State Environment Impact Assessment Authority (SEIAA) ha kaba ïadei bad ka Environment Clearance, hynrei ka seng ka lap ba kine ki kompeni kim shym la lah ban pynbiang ïa ka jingdonkam jong ki trai shnong jong kato ka thaiñ ba ki don, khamtam ha ka thungkam thungjam bad ka jingpynïoh ïa ki kam pynroi ha ki shnong ki thaw.
Ka Seng ka la kynnoh ruh ba ka don ruh ka jingleh shiliang bad jingkhñiot beiñ ïa ki kontraktor bad ïa ki suplaïar kiba dei ki trai jylla kumjuh ruh wat ïa ki nongtrei bylla hapoh kine ki ar tylli ki shlem pynmih dewbilat.
Ka seng ka la kam ruh ba ka la lap ruh ba ka jingthmu jong ka M/s Meghalaya Cements Ltd. ban pynheh shuh shuh ïa ka karkhana jong ka bad ruh ka jingkhlong maw da ka M/s Green Valliey Industries Ltd ha shnong Brishyrnot, kaba don hajan jong ka Eco– Sensitive Zone bad ka Narpuh Wildlife Sanctuary, Sonapur, East Jaiñtia Hills kan ktah ïa ki mrad ki mreng, ki sim ki doh kiba don ha ka khlaw bad kan ktah ruh ïa ki khlaw ki btap.
Ha kajuh ka por ka seng ka la pynpaw ba lada kine ki kompeni kin ïohlad ban khlong maw ha kitei ki bynta khlem pep kan ktah ruh ïa ka Wah Lukha bad kan sa pynïap ïa ki dohum kiba don ha ki um ki wah kumjuh ruh kan jia ka jingtwa khyndew kaba jur sha ki bynta jong ka Wah.
Ka JNC ka la dawa jur ba dei ban pynsangeh shwa ïa kane ka jingthmu ban pynlong ïa ka Public Hearing tad haduh bym pat lah ban thaw ki lad ki lynti kiba biang kiba paka kiba lah ban pynbiang ïa ki jingdonkam jong ki nongshong shnong ka thaiñ kumjuh ban wanrah ïa ki lad jingïada kiba pura.