Dawa ka JNC ban pynrung noh ïa ka ktien Pnar hapoh ka Meghalaya State Language Ac

Jowai, Nailur 24: Ka Jaiñtia National Council (JNC) CEC mynta ka sngi hapoh ka jingïalam u bah Wanshwa Suting General Secretary Sengkmie ryngkat bad ki nongïalam ka CEC ki la leit ban ïakynduh markhmat bad u CEM ka JHADC ma Thombor Shiwat ryngkat bad ki dorkhas halor ka phang ban thaw noh da ka dorbar ba kyrpang ban dawa na ka sorkar jylla ban pynrung ïa ka ktien Pnar hapoh ka Meghalaya State Language Act, ban ban thaw da ka aiñ kaba khlaiñ ban pynneh pynsah ïa ka ktien ka thylliej bad ïa ka Riti ka Dustur hapoh ka jingpeit ka JHADC.
Ka seng ha ka jingthoh ka la ong baka JNC kadei kawei na ki seng napoh ka Ri Jaiñtia kaba mih shakhmat ban dawa na ka sorkar jylla ba ka la dei ka por ban pynrung noh ïa ka ktien Pnar (kaba long ka ktien pdeng hapoh Jaiñtia) hapoh ka Meghalaya State Language Act bad ba ka JHADC ruh kadei ban don da ka aiñ kaba kyrpang na ka bynta ban pynneh pynsah ïa ka Riti Dustur khamtam ha ka rukom ai jait sha i kmie bad ïa ine i mat dawa ka seng ka la juh pynsngew ruh ha kylleng ka Ri Jaiñtia lyngba ka Save Jaiñtia Mission.
Haba ïakren bad u CEM, ka seng ka la pynpaw Kumba ka JHADC ka la mynjur ban ithuh noh ïa ki dak thoh A-B Jaiñtia bad ïa kane ka rai la dep ban pynbna ha ki lad pynthai khubor ka jylla ha u snem 2021.
Ka JNC ka pynpaw ruh ïa ka jingsngew ba lah donkam ïa ka JHADC ban sdang noh ban pyndonkam ïa ki dak thoh A-B Jaiñtia ha ki jingthoh jingtar ki jong ka, khamtam ha ki kam shna aiñ, haba pynmih ïa ki jingpyntip ki bapher bapher. Ka JHADC ka dei ban wad ïa ki lad ki lynti ba kumno ban leh ban ïoh pynrung ïa ki dak thoh Jaiñtia khamtam ha ki skul kiba hap hapoh ka jingpeit jong ka.
Na ka liang ka seng ka pynpaw ruh ba donkam ïa ka JHADC ban pyntreikam (pass) noh da ka rai (resolution) hapoh ka Dorbar jong ka ban dawa na ka sorkar jylla ban ithuh noh ïa ka ktien Pnar kum kawei na ki ktien badon ïa ki jingthoh jingtar (official) hapoh ka jylla da kaba pynrung ïa ka ktien Pnar hapoh ka Meghalaya State Language Act, haba im ka ktien im ka jaidbynriew, ong ka seng.
Shuh shuh ka seng ka ong kaba pynïapher ïangi ki khun ka Ri Jaiñtia (Pnar, War, Khynriam, bhoi) na kiwei pat ki para riewlum hapoh u pud u sam ka Ri Jaiñtia ka dei ka rukom ai jait sha ka kmie.
‘Kum ki khun u Hynñiewtrep naduh kulong kumah, u barim bajah u juh hikai ba ka jait kan dei beit sha ka kmie bad haduh mynta ka dang ïai bat ïa kane. Ha kane ka pyrthei stad mynta, la don kiba pyrshang ban ïalam bakla ïa ka jaidbynriew ban pynkylla ïa kane ka jinglong ba kyrpang’, dei na kane ka daw baka JNC ka mih shakhmat ban ai jingmut ïa ka JHADC ba la donkam kyrkieh ban shna noh da ka aiñ kaba khlaiñ na ka bynta ban ïada ïa Riti ka Dustur.
Katba ngi dang lah ban ïada ïa ka Riti ka Dustur ngi dang lah ruh ban ong ba ngi long ka jaidbynriew bad kyrpang tam bad kine kiwei pat ki riewlum ruh kiba shong lang bad ngi kin nym lah ban kam trai ïa ka Ri jong ngi namar ngi ïapher lut bad ki, ong ka JNC.
Ka JNC ka kyrpad jur ïa ka JHADC lyngba u CEM badei ban don noh da ka dorbar ba kyrpang ban ïatai bad kine ki mat jingdawa ka seng.
Hadien ka jingïakren bad ka seng na ka Liang u CEM u ruh u mynjur ïa kane ka bynta bad u la kular ruh ban buddien ïa kane ka kam ha kine ki sngi ban sa wan khnang ban myntoi ki nong Jaiñtia hi baroh kawei, namar ula pynkynmaw ruh ba ïa ki dak thoh AB Jaiñtia ka JHADC ka la dep ban phah sha ka sorkar jylla bad haduh mynta ka dang neh hapoh ka Law Department ban bishar bniah.