Dawa ka JNC ban kynthup lang ïa ki Waheh Shnong bad Daloi hapoh ka Regional Committee

Jowai, Naitung 30: Ka Jaiñtia National Council (JNC) ka kwah ban pynpaw ïaka jing sngewkhia kaba jur halor ka jingleh jong ka Karbi Anglong Autonomous Council (KAAC) halor ka jingbuh ka jong ka ïaka Khyrdop khrong Khajna (Entry Taxes Gate) hapoh u pud u sam jong ka Shnong Khanduli, West Jaiñtia Hills District.
Kane ka jingleh jong ka KAAC ka pyni shai kdar ba kim burom ïaki Regional Committee pynbeit pud jong ki 2 tylli ki Jylla (Meghalaya & Assam), ka seng ka lyngngoh ruh ban ïohi baka Jaiñtia Hills Autonomous District Council (JHADC) ka long tang ka nong peitkai halor kane ka jingkyntur jong KAAC sha u pud u sam jong ka JHADC, watla ka jingïa kren ban pynbeit ïa u pud u sam hapdeng kine ki 2 tylki ki jylla ka dang ïaid shait shait shakhmat lyngba ki Regional Committee for Border Disputed hynrei naka liang ka KAAC bad ki paitbah Karbi ruh ki dang ïaid shait shait shakhmat ban pyni bor ïaki Pnar bad kyntur ruh sha u pud u sam ka Jylla Meghalaya.
La pynsngew ba ka jingbuh jong ka KAAC ïaka khyrdop khrong khajna hapoh ka Shnong Khanduli, West Jaiñtia Hills kaba dang hap hapoh ka jingpeit jing khmih jong ka JHADC, bad ka jing pyndik pynthut jong ki Karbi ïaki jaka Rep jaka Riang jong ki Pnar, ka pynsuba jur ïa ka seng ba kine kiei kiei baroh kidei ki buit poh jong ka Sorkar Assam ban klun ïaki jaka jong ka West Jaiñtia Hills shapoh Assam, ha kane ka jing pynbeit ia u pud u sam (phase 2).
Kumta halor kane ka nongrim na kaliang ka JNC ka kyntu jur ïaka Regional Committee for Border Disputed, West Jaiñtia Hills District ban kynthup lang ïaki Waheh Shnong bad ki Daloi jong ki Shnong Khappud kiba hap hapoh ka jingpynbeit ïa u Pud u sam (phase 2) hapdeng ka Meghalaya bad Assam.
Kum ka seng kala sakhi haka jingïa pynbeit ïa u pud u sam (Phase 1) kam shem la pynhun ïaki ba bun ki Shnong bad kila kynnoh baka Sorkar kala shu leh donbor ïaki khlem da kynthup lang ïaki Nongshynshar Shnong, ki Syiem, ki Sirdar ter ter hapoh ka Regional Committee bad shibun ki jaka ba hap hapoh Meghalaya kila leit noh shaka Assam.
Khnang ba kan ym wanrah ïa kano kano ka jing bymhun ha kane ka jing pynbeit ia u pud u sam (phase 2) ka JNC sa shisien ka kyntu jur ïaka Regional Committee ban kynthup lang ïaki Waheh Shnong bad ki Daloi jong kito ki shnong ki Elaka kiba hap hapoh ka Jingpynbeit ïa u Pud u sam (phase 2) hapoh ka Regional Committee for Border Disputed Area.