Dawa ka jingïalang ha Amlarem ban pynkloi ïa ka Kaiphot pynkylla Reservation Policy

Jowai, Jylliew 02 : Ka Jaiñtia Co-ordination Committee for Reservation Policy (JCCRP) kaba kynthup ïa ki seng bhalang, Synjuk Waheh Chnong War Jaiñtia (SWCWJ), kiba kynthup ïa ka Jaiñtia Student Union (JSU), Jaiñtia Youth Federation (JYF), Jaiñtia Student Movement (JSM), East Jaiñtia National Council (EJNC), mynta ka sngi 02.06.2023 kila bteng ïa ka jingshong kyllaiñ myngngor ha Iew Amlarem, jong ka Amlarem Civil Sub-Division, na ka bynta ban dawa na ka sorkar ban pynbeit ïa ka Reservation Policy jong ka jylla. Ïa ka jingïalang la pynïaid da u Waheh Shnong ka Amlarem u Kampher Pohlong.
Ha kane ka sngi la ioh ïa ki jingkren na u Chairman JCCRP samla Jershom Shylla (President JSU), Secretary JCCRP samla Sambormi Lyngdoh (President EJNC), Heiboimi Myrphet na ka JSM, ma Kolmen Pohshna Adviser ka SWCWJ, kong Deiwi Tongper (STIEH), Treibor Suchen (GS-JSU), Damonmi Dkhar Waheh Shnong Nartiang Modop bad kiwei de.
Kiba bun na ki nongkren kynthup ïa ki nongïalam sengbhalang, ki nongïalam shnong, ki riew paidbah bad ki riew rangbah kila kynthoh ïa ka sorkar MDA-02 ba la lam khmat da ka NPP mynta. Kila ban jur ba ka por kala dawa bha ïa ka sorkar ba kan pynbha noh ïa kane ka rukom thungkam thung jam hapoh ka jylla, khnang ban lait na kino kino ki jingeh khamtam ïa ki samla wad kam ha kine ki sngi ba mynta, namar bun hi ki khun samla ynda kila dep ïa ki jingpule kiba hap ban shong khlem kam khlem jam” kila pynpaw.
Shuh shuh kila ai ki jingïaroh ïa u bah Ardent Miller Basaiawmoit u nongïalam jong ka VPP uba la shah thngan haduh 9 sngi na ka bynta ban dawa ïa kane ka kam ha kaba na ka liang ka sorkar ruh ka la shim khia bad ka la rai ban thaw ïa ka Expert Committee ban peit ne bishar bniah ïa ka Reservation Policy. Ha kaba na ka liang jong ki seng bhalang kila kyntu ïa ka sorkar ban pyndep kloi ïa kane jingbishar bad ban pynïoh ïa ka kaiphot kloi katba lah. Na ka liang jong ki ruh ki khmih lynti ba ka sorkar lyngba katei ka Expert Committee kan pynhun ïa ka jingdawa jong ki paidbah Hynniewtrep.
Shuh shuh kila kyntu jur ïa baroh ki MLA ka Ri Lum Khasi-Jaiñtia ba kin mih sha khmat na ka bynta kane ka kam kaba donkam ïa ka lawei jong ka jait bynriew.