Dawa ka JAC ïa ka Sorkar ban phah pahara ïa ki Pulit ha ka sngi leit ot kba ki nongrep Lapngap

Shillong, Risaw, 14: Ka Joint Action Committee on Border Issue (JACBI) ka la dawa ïa ka Sorkar Jylla ba kan phah da ki Pulit ki ban pahara ïa ki nongrep jong ka shnong Lapangap ha ka sngi ba ki leit ot ïa u kba sha lyngkha.
Ka JACBI kaba kynthup ïa ka Synjuk Waheh Chnong Ri Jaiñtia, u Waheh Shnong Lapangap, ka Jaiñtia National Council (JNC), ka Jaiñtia Students Union (JSU), ka Khasi Student Union (KSU), Federation of Khasi Jaiñtia and Garo People (FKJGP) bad ka Jaiñtia Students Movement (JSM) ryngkat ka jingsynran lang jong u Symbud Myntri Rangbah ka Jylla Bah Sniawbhalang Dhar ha ka jingïakynduh ïa u Myntri Rangbah ka Jylla u Conrad K. Sangma ha ka sngi Baar ki la aiti ruh ïa ka dorkhas ba dawa ban shimkhia ïa ka jingkajia ha khappud ka Meghalaya bad Assam bad khamtam eh ha ka shnong Lapangap.
Ka JACBI ka la ong ba na ki jingjia ba dang shen bad ki jingïakynad, la donkam ban pynkhlaiñ ïa ki bor Pulit ki ban pahara ha ka shnong Lapangap khnang ban ai jingïada ïa ki paidbah nongshong shnong.
Nalor kata, la dawa ruh ïa ka Sorkar ban phah pahara ïa ki Pulit ha kylleng ka shnong Lapangap khamtam ha ka sngi ot kba, ban phah ïaid pahara ïa ki Pulit khnang ban khanglad ïa kano kano ka jingthmu rung tuh ne leh kino kino ki kam beaiñ na shiliang khappud. Ban ai jingïada ïa ki nongshong shnong khnang ba kin ïoh leit sha ki lyngkha khlem kano kano ka jingsheptieng.
Ka JACBI ka la kyntu ïa ka Sorkar ba kam dei ban shu ai ha ki Pulit tang u lathi hynrei ban ai ruh ïa ki tiar katkum ki kyndon bad ki suloi, ban pynbiang ïa ki kali, ki kor phah khubor bad kiwei kiwei ki lad jingïarap khnang ba kin dup lah ban ïada bad ban leh mardor ïa ka kam lada jia ba ka don kano kano ka jingpyntieng ne ka jingbyrngem na shiliang khappud.
“Ka jingpynbiang ïa ki Pulit ïa ki tiar ki tiar kan pynthikna ïa ki nongshong shnong ba kin ym tuklar ïa ki bor jong ka aiñ da kaba shim halade ïa ka aiñ kaba lah ban lam sha ka jingïapynibor bad kaba lah ban nang pynheh shuh shuh ïa ka jingïakynad.
Shuh shuh ka JACBI ka la pan jingpynshai ba haduh katno sngi ka jingpynjari ïa ka Section 163 of BNSS kan treikam ha khappud.
“Ngi kwah ruh ban pynpaw, wat haba la shim ïa kine ki sienjem, kim dei ban khanglad ïa ka leit ka wan jong ki nongshong shnong ne ban pynwit ïa ka kam kamai jakpoh, khamtam ha kum kane ka por ba ka dei ka por ot kba ha ka shnong Lapangap. Ki nongrep kiba dei hok ban rah ïa ki tiar rep ki dei ban ïoh jingïada da kaba pynthikna ïa ka shongsuk shongsaiñ ha ka thaiñ,” la ong ka JACBI.
Ka JACBI ka la maham ruh lada ka Sorkar kam lah ban ai jingïada ïa ka hok bad ïa ka kam kamai jakpoh jong ki paidbah kiba sah ha khappud, khamtam ïa ki paidbah ka shnong Lapangap khamtam ha kum kane ka por ba dang dei ka por ot kba, ka Sorkar ka hap ban shim hi ïa ka jingkitkhlieh lada mih kano kano ka jingjia.
“Ngi kyntu ïa ka Sorkar ba kan shim ïa ka jingkitkhlieh bad ban pynthikna ba ki longiing kiba shah ktah ki dei ban ïoh ïa ka bailutksan namar ka jingduhnoh ïa ki marbam, ka kamai kajih. Shuh shuh ka Sorkar ka dei ban ai jingïarap, kynthup ïa ki marbam bad kiwei kiwei ki lad jingïarap, ban ïarap ïa ki nongrep ba kin dup ban bteng ïa ka jingim jong ki,” la dawa ka JACBI.