Nongstoiñ, Jylliew 26: Ka HYC West Khasi Hills ha ka jingïakynduh markhmat bad u Bah Shakliar Warjri Myntri kam ïalehkai ka sorkar Jylla ha Nongstoiñ ha ka sngi nyngkong, ka la dawa ba u dei ban shimkhia ban pynïoh madan phlang plastic ha Nongstoiñ bad Mawshynrut.
Ha ka shithi jong ka seng sha u Myntri ba long ruh u MLA ka Mawthadraishan Constituency, ka la pynpaw ba ka West Khasi Hills ka la kynjoh 46 snem tam ka karta. Hynrei, haba phai sha ka roi ka par kyrpang ha ka koit ka khiah, ka dang sahdien.
Nalor nangta, haba phai sha ki jaka ïalehkai ban kyntiew ïa ka kam sports ruh dang sahdien sah shrah. Kumta ka sngew dei ban kyntu sha u Myntri ba un shimkhia ban wanrah ïa ki madan ïalehkai kiba bha bad ban pynbha shuh shuh ruh ïa ka Nongpathar Stadium.
