Shillong, Jylliew, 01: Ka Hynñiewtrep Youths Council (HYC) ha ka sngi Palei ka la phah da ka jingthoh sha u Myntri Rangbah ka Jylla u Conrad Kongkal Sangma ban dawa ïa ka Sorkar ba ka dei ban bthah ïa ki Chairman, Co-Chairman, Vice-Chairman bad ïa u Deputy Chairman jong ka Meghalaya Economic Development Council (MEDC), ka Meghalaya Resource and Employment Generation Council (MREGC) bad ka Regional Planning and Development Council (RPDC) ba ki dei ban pynphai lut ïa ka pisa kaba ki la dro kum ka Honorarium, Allowances bad kiwei kiwei ki jingïoh.
Kane ka jingdawa jong ka seng ka long hadien ba ka la ïoh ïa ka jubab RTI na ka tnat Planning jong ka Sorkar Jylla kaba la pyntip ba ha u Lber, 2018 haduh u Rymphang, 2023 la thaw ïa ka Meghalaya Economic Development Council (MEDC), ka Meghalaya Resource and Employment Generation Council (MREGC) bad ïa ka Regional Planning and Development Council (RPDC), Khasi Hills Region na ka bynta ban treikam ïa ki kam ba la bynshet ha kine ki lai tylli ki Council.
Katkum ka jubab RTI la pynpaw ba haduh T. 68,86,6239, T. 1,14,87,259 bad T. 360298 la pynlut tang ha kaba siew sha ki nongtrei jong ki Chairmen, Vice-Chairmen, Co-Chairmen bad Deputy Chairmen ka MEDC, MREGC bad RPDC ha kine ki snem. Ka jubab RTI ka la pyntip ba haduh T. 86,16,027 la pynlut ha ka MEDC, T. 1,72,31,682 ha ka MREGC bad T. 3,27, 780 ha ka RPDC tang ha kaba siew sha ki Chairmen, Vice-Chairmen, Co-Chairmen bad Deputy Chairmen jong kine ki Council kum ka Honorarium, Conveyances Allowance, House Rent Allowance, Hospitality Charges, Electricity Charges, TA/DA, Maintenance of Furniture bad kiwei kiwei.
Ka seng ka la kam ba ha kine ki snem, kine ki Council kim shym la trei eiei ruh em ha ki samoi treikam bad kim shym la noh synñiang eiei sha ka Jylla namarkata kim don hok ban kam ïa ki jingïoh jingmyntoi bad ki jingsiew katkum ka jingthungkam ïa ki.
“Dei ban pynthikna ban leh eiei pyrshah ïa ki kham kloi bad ban kiar na kaba pynsyrwa kai ïa ka pisa u paidbah. Ka jingsiew sha ki Chairman, Co-Chairman, bad kiwei kiwei jong kino kino ki Council/Committee/Commission, ka dei ban long tang hadien ba la ïohi ïa ki jingtreikam jong ki katkum ba la pynkupbor ïa ki. Dei ban pynsangeh noh mardor ïa ka jingthungkam ïa ki nongtrei Casual ha ki Committees/Commissions/Council bad kiwei kiwei tad haduh ba ka Sorkar Jylla kan da wanrah da ki polisi treikam kiba shai,” la ong ka Seng ha ka dorkhas.
