Shillong, Jymmang, 22: Ka Hynñiewtrep Youths Council (HYC) ha ka sngi u Blei u la dawa ba dei ban thung da ka kynhun tohkit halor ka jingkhyllem jong ka Dome ba la pynieng ha ka Ingdorbar Thawaiñ ba thymmai ha New Shillong, Mawdiangdiang.
“Dei ban thung ïa ka kynhun tohkit halor kane ka jingjia bad ban pynshitom ruh ïa baroh ki Engineer, ki ophisar, ki Kontraktor bad kino kino ki briew la ka long ki Politician ne ki Ministar ruh. Ka Seng ka dawa ruh ba dei ban thung da kawei pat ka kynhun ba laitluit (Independent Agency) ka ban ai syrnot la kane ka building ka long neem kaba shngaiñ ban pyndonkam hadien habud ïoh ba ynda lah plie ïa ka bad pyndonkam kan wanrah ïa ka jingjia basngewsih lada khyllem noh ha kum katei ka por,” ong u kyrwoh ba la phah da u General Secretary ka Seng u Bah Roy Kupar Synrem.
“Ki jingjia ha kine ki sngi ki pynlong ïa ki paidbah ban syier bad sheptieng ban pyndonkam ïa ki Building ba peit ba khmih da ki Engineer jong ka tnat PWD ka Jylla, ïoh kumno kumno ka wanrah pynban ïa ki jingjia basngewsih,” ong u kyrwoh.
“Dang ha kine ki sngi kiba ladep ngi lah ïohi ïa ki dak jong ka jingtrei torti ïa ka ISBT, Shillong, ka Jingkieng ha Mawlai Bye-pass bad sa mynta pat lah paw tyngkreiñ ka kam bamsap lyngba ka jingkhyllem noh jong kawei na ki bynta jong ka jingtei ïa ka Assembly ha Mawdiangdiang hapoh ka jingsynshar jong kane ka Sorkar ba ïalam da ka NPP,” la kynthoh ka Seng.
“Katkum ka jingtip jong ngi tang na ka bynta ban pynieng ne rah ïa ki nar ban shna ïa ka tnum pyllon ba hapdeng (Dome) lah pyndonkam ïa ki tiar mashin ban shimwai ha ka dor 6 lak tyngka shisngi lait noh ka dor ki tiar ki tar bad ki jinglut jingsep kiba lehse ka lah ban poi da ki klur tyngka tang na bynta kane ka bynta kaba khyllem noh. Ka jingkylli ka long balei khyllem kane ka jingtei? Hato dei namar ba trei torti u Kontraktor lane namarba hap pyndonkam da ki tiar kiba tad namar lah bun palat ka jinglut hangne hangtai lane ne la tei ïa ka tang ban dep da hap ne khyllem ruh ym lei lei?” la buh jingkylli ka HYC.
“Ngi kwah ruh ban kylli ba kumno ki Engineer jong ka tnat PWD Building kiba dei peit ïa katei ka kam ki khlem jurip bniah halor ka jingskhem bad ka jingbha jong ki tiar kiba pyndonkam lane kine ki heh Engineer ki bunkam ïalade ban pynkhreh ïa kiwei pat ki bynta kum ban pynkhreh Election tangba ki dang shim tulop pat na ka Sorkar?” la kynthoh shuh shuh ka Seng.
Ka Seng ka maham ruh ïa ka Assembly Secretariat ba kam dei ban pdiang ïa kano kano ka jingdawa jong u Kontraktor ban pynheh ïa ka dor jong ka Kontrak namar kane ka jingjia bad kiba donkti ki dei ban sei hi na la ka pla ban shna bad pynieng biang khlem da ktah shuh na ka pisa paidbah.
“Lada ka Assembly ne ka Sorkar ki rai ban pdiang ïa kano kano ka jingdawa u Kontraktor, ka Seng kan pyrshah jur bad Kan ym shah da leilei ruh ïa kum kine ki kam bamsap ban nang jyrsieh shuh shuh,” la ong ka Seng.
