Dawa ka HLOA ïa ka MePDCL pynkynriah ïa ki post Electrict ha surok Nongstoiñ-Rambrai

Nongstoiñ, K’lyngkot 24: Ka jingpyntrei ïa ka surok two lane Nongstoiñ Kyrshai ha ka wat kaba nyngkong kaba ha ka jingjngai kaba 32 kilomitar, ka la ïaid shait shait bad la khmih lynti ba hapoh une u snem yn lah ban pyndep kumba la thmu. Wat la ka jingpyntrei ïa katei ka surok ka la ïaid shait shait, hynrei ki dang don ki jaka kiba ka kompeni kaba pyntrei ka la hap ban sangeh shuwa namar ba ki don ki electric post kiba donkam ban pynkynriah, namar ki don ha ki jaka pdeng ba ka surok ka dei ban ïaid bad kiba wait haba pyntrei ïa ka surok.
Ka synjuk ki Ranbah shnong kiba dei ki trai khyndew jong ki jaka kiba don ha shilynter katei ka surok, ki la leit ban buh da ka dorkhast ha u Executive Engineer na ka Meghalaya Power Distribution Private Limited Nongstoiñ Division, ban kyntu ïa katei ka tnad sam bording ba ka dei ban pynkloi katba lah ban pynkynriah jaka ïa kitei ki post lait.
Ha u kyrwoh ba la pyllait da u bah Ghosally Marweiñ president ka HLOA, la ong ba ki don ruh ki jaka kiba ka laiñ jong ka surok ka tyngkhuh hajan eh bad ka khyndew ka lah ban twa kumta ki electric post ki lah ban khyllem lada dei ha ka por ba jur ka lyer. Ha kaba ïadei bad ka jingdon jong katto katne ki electric post hapdeng ka surok, utei u nongïalam ka synjuk u la ong ba ka long kaba pynwit bha ban trei bad ki don ruh ki jaka kiba ki sainar electric ki la sdang ban synjor bad lada jia ba ki dkut ha kano kano ka por, kan buh ha ka jingma kaba khraw ïa ki briew kiba ïaid ba ïeng khamtam ïa ki khynnah sharai masi bad ki jingri jingdup jong ki.
Ha kaba ïadei bad ka jingpyntrei ïa katei ka surok, la ong ba ki paitbah ka thaiñ ki angnud bad kwah eh ïa ka Kompeni kan pynsted bad pynkloi, khnang ba ki paitbah kin kham lait na ki jingeh ha ka leit ka wan ka kit ka bah bad ka kamai kajih. Nalor kata la ong ruh ba ki la leit ban ïakynduh bad ki nongpynïaid jong katei ka Kompeni kaba pyntrei ïa katei ka surok, ban kyrpad ïa ki ba kin pynsted ïa ka jingtrei bad ba kin leit ban ïaynbeit noh kham kloi bad ka Meghalaya Power Distribution Private Limited, na ka bynta ban pynkynriah ïa kitei ki electric post, khnang ba ka jingtreiu kan kham sted.
Kum ban pynkynmaw ba ha u snem ba la dep ki nongïalam ka National Hynñiewtrep People ba la ïalam da u bah Kharlesborn Nongbri, ki la leit ban jurip ïa ka jingdon jong ki electric post ha baroh shilynter ka surok naduh Nongstoiñ haduh Rambrai. Nangta ki la leit ban ïakynduh ruh ïa u Executive Engineer ka MePDCL Nongstoiñ Division bad kyntu ïa u, ba un phah pynkynriah noh ïa kitei ki post. Hynrei haduh mynta ym shym pat leh ei ei bad dei halor katei ka jingsuki jong ka MePDCL ban pynkynriah ïa kitei ki post, ba ka jingpyntrei ïa katei ka surok kam shym la ïaid beit bha.