Shillong, Nailur 28: Ka Hynñiewtrep Achik National Movement (HANM) ha ka sngi Thohdieng ka la kyrpad bad dawa na u Myntri ka tnat Bording ka jylla u AT Mondal ban tuklar ïa ka jingeh haba ïadei bad ka jingthut ka rukom sam bording ba la mad na ki nongshong shnong ka Ri Bhoi district.
Ha ka dorkhas ba la aiti sha u Mondal, ka HANM Ri Bhoi District ka la ong, “Watba ka district ka don ka bynta kaba khraw ha kaba ïadei bad ka jingpynmih bording na ka bynta ka jylla hynrei ka dang ïaibteng ban mad ka jingeh kaba manla ka por halor ka rukom sam ïa ka bording, kaba la ktah jur ïa ka roi ka san jong ka jingim ki briew ha ka thaiñ.”
La ong ba ka Ri Bhoi ka la long ka District ba pura ha ka 4 tarik u Jylliew 1992, haba ka Nongpoh ka long kum ka headquarters. Da kiba bun snem ki nongshong shnong ki la nangkiew sted ka jingbun briew ha kaba kane ka la lam sha ka jingdawa ban pynbiang ïa ka bording.
“Kumba ka long mynta ka Nongpoh ka shaniah beit tang ha ka single 33KV Umsning-Jyntru power line, ha kaba kam long kaba lah ban pynbiang na ka bynta ka district kaba la nangheh. Da ka jingdon kumba palat 400 tylli ki shnong bad malu mala ka jingbun ki nongshong shnong kam duna ïa ka 25,000 ki longïing bad dei halor kane ka long kaba donkam kyrkieh na ka bynta ban don da ka 132KV power substation ban kynduh ïa ki jingdawa bad ban pynduna ïa ka jingpynlip bording ba manla ka por,” ka la ong.
Haba ong ba ka Ri Bhoi District ka dei ka ïing jong ki 5 tylli ki major power station, ka HANM ka la ong ba kine ki station ki pynmih ka bording kaba 216 MW.
Ka la ong ba kine ki jingpynlip bording ba khah khah ka shait neh kumba 2 ne 3 sngi bad kaba neh ruh bun ki sngi kaba la pyndkoh ïa ka jingim ki briew bad ki kam ki jam, bad ki kam shakri kiba kongsan, da kaba pynpaw ba ka jingshañiah beit tang ha ka 33KV line ka la ktah ïa ka district ban ïoh ïa ka bording kaba biang.
Ka la ong ba ka Nongpoh, kaba dei ka district headquarters, ka don bun ki jaka pule, ki ophis ba donkam kum ka Deputy Commissioner Office, ka ophis Superintendent of Police Office, ka District & Sessions Court, Nongpoh, ka Civil Hospital Nongpoh, ka Nursing Institute ha Pahamsyiem, ka Ri Bhoi College bad kiwei ki tnat sorkar, ki school, ki bank bad ki jaka khaiï. Ka jingshah pynthut ka jingïoh ïa ka bording kaba la ktah ïa ki jaka treikam, ki jaka pule, ki jaka ai jingsumar bad kiwei kiwei.
Halor kine baroh na ka liang ka HANM ka la kyntu ïa ka sorkar jylla ban shimkhia noh mardor ban pynïoh noh da ka 132 KV power substation ban lah ban pyndap bording hapoh ka district.
