Nongstoiñ, Nailur, 13: Ka jingbym pat pyntreikam pura jong ka sorkar ïa ka Mwshynrut Civil Sub Division, ka la buh ïa ki paitbah ha ka jingeh ha kiba bun ki liang, ong ki nongïalam ka FKJGP Mawshynrut circle, haba ïakren bad ki lad pathai khubor mynta ka sngi.
U bah Eveningstar Myrthong general secretray ka FKJGP Mawshynrut, u la ong ba ka Mawshynrut Civil Sub Division ka la kynjoh hynriew snem kynthih naduh ba la plie ïa ka, hynrei haduh mynta kam shym pat la trei kam pura ha baroh ki bynta.
Nalor kata u la ong ruh ba wat tang ka ophis ba pura jong ka Civil Sub Division ruh kam pat don bad dang shu pynlong ophis ha ka PHC barim ha Riangdo. Nangta kiwei kiwei ki tnad treikam kata naduh ka Election Branch, Supply, SDSEO bad kiwei kiwei kim pat don satia, ha kaba ka la buh ïa ki paitbah ha ka jingeh kaba khraw namar ïa baroh ki kam ki dang hap ban wan pyndep ha Nongstoiñ.
U la ong ruh ba halor kane ka jingbym pat treikam pura jong ka Civil Sub Division, ki la leit ban ïakynduh ïa u Deputy Commssioner ka West Khasi Hills District, ban pynkynmaw ïa u ba un pynsngew sha ka sorkar ba ka dei ban pyntreikam pura noh ïa baroh ki tnad treikak kiba dei ban don ha ka Civil Sub Division, khnang ba kan pynsuk ïa ki paitbah jong ka thaiñ.
Utei u nongïalam ka seng u la ong ruh ba ha ka jingleit ïakynduh ïa u Deputy Commissioner, ki la pynkynmaw ruh ha kaba ïadei bad ka jingbym pat treikam satia jong ka Shallang C& RD Block, kaba la jan dap shisnem mynta naduh ba la wan plie ïa ka da u Myntri rangbah ka jylla u Conrad Kongal Sangma ha u bnai Naiwieng jong u snem ba la dep.
U la ong ruh ba ha Shallang Block tang u Block Development Officer ruh ym pat don bad ki paitbah kiba trei bylla shispah sngi, ki dang hap ban wan pyndep ïa ki jingdon kam haduh Riangdo Block kaba la pynjynjar bha ïa ki.
U la ong ruh ba na ka bynta ban pynsuk ïa ki paitbah, ka seng ka dawa ruh na ka sorkar ba kan plie noh sa kawei lane ar tylli ki Bank ha Shallang, khnang ba kan pynsuk ïa ki paitbah kiba kynshew pisa bad kiba trei ïa ki kam bylla shi spah sngi, namar ki shem jingeh palat ban wan haduh Riangdo.
