Dawa ka FKJGP ban pynshitom ïa kiba pynïap dusmon ïa ki sawngut ha ka shnong Umpleng

Khliehriat, Naitung, 09: Ka Federation of Khasi Jaiñtia and Garo People-East Jaiñtia Hills District ka la pynrem jur ïa ki ‘riew thrang snam kiba pyniap dusmon ïa ki saw ngut ha ka shnong Umpleng, East Jaiñtia Hills District.
“Halor ka jingshah pyniap u Nasar Kyndait ryngkat bad ki lai ngut ki bar jylla dang ha kine ki khyndiat sngi ba ladep da ka jingleh riewkhlaw da ki katto katne ki riew thrang snam ki bym lah ban tip ne ithuh, katkum ki tyllong khubor ngi iohi bad suba ba kitei ki saw ngut ki lah ban shah pyniap shwa na kawei ka jaka hynrei la wan bret pat ïa ka met iap jong kitei ki saw ngut ha jan ka ïew ha Umpleng, East Jaiñtia Hill District bad kum ka seng kaba peit ïa ka bha ka miat,” ong u kyrwoh na u President bad u General Secretary ka FKJGP East Jaiñtia Hills District Bah D.Sumer bad Bah Emlang Sutnga.
“Kam lah ban pdiang da leilei ruh ban shu pyniap beiñ kum ki mrad kum ki mraw ïa ka kynja doh briew bad lada dei shisha ba ki jingkynnoh katkum ba iohi ha ki lad pathai khubor ba kitei ki saw ngut la suba ba ki lah ban dei ki nongdie bad nongdih drok hynrei ha ka jingsngew hi ba lada dei kumba kynnoh ruh ym dei pat ban leh riewkhlaw hynrei dei ban ai jingsneng da ka rukom kaba dei bad pyni ha ka rukom kaba dei ban im,” la ong u kyrwoh.
“Khatduh lada shem ba ki tuh ki thiem ruh dei ban aiti sha ki bor ka aiñ ym pat ban shim ïa ka aiñ ha kti lajong bad ban thaw ruh ki lad ki lynti ban kin wanphai biang sha ka imlang sahlang kaba bha,” la ong ka seng.
Ka Seng ka la dawa ïa ki bor ka aiñ ba ki riew thrang snam kim dei ban lait na kti ka jong ka aiñ bad lada ki Pulit kim lah ban kem ïa ki nongpyniap briew ka mut ka don kaei kaei sha lyndet.