Nongstoiñ, Naitung 11: Na ka bynta ban pynsuk ïa ki bapang ba shitom jong ki shnong kiba don ha ka thaiñ Mawdoh kata naduh Rangesohïong, Nongthymmai, Synnia, Mawdoh bad kiwei kiwei ki shnong ha ka thaiñ, ki nongïalam bad ki dkhot ka Federation of Khasi Jaiñtia & Garo People Mawbuhtraw Unit, ki la leit ban jurip ïa ka National Health Mission Sub Centre kaba don ha Mawdoh, ha kaba ki la lap ba ki don shibun ki jingduna.
U Secretary ka Unit u la ong ba ha katei ka jingleit jurip, ki la lap ba ki paitbah ba pang ba shitom ki shem jingeh haduh katta katta haba ki leit ha katei ka jaka sumar, namar ba ym don doctor kiba peit ba khmih ne ban eksamin ïa ki, hynrei ki don tang katto katne ngut ki nongtrei bad ka ANM.
La ong ruh ba ka seng ka la lap ba ki paiñkhana kim biang satia, ka um bam umdih ruh kam biang bad la I donkam haduh katta katta ban thung nongtrei biang ha katei ka Sub Health Centre, khnang ba ka jingtrei kam kan ïaid beit ïaid ryntih.
La ong ruh ba ka jingdon briew ha ki shnong kiba hap ha ka jingpeit bad jingkhmih jong katei ka Sub Health Centre, ka la palat ïa ka san hajar ngut bad ka la don kam haduh katta katta ban pynbit pynbiang ïa katei ka jaka sumar.
U la ong ruh ba ka seng ka dawa na ka sorkar ba ka dei ban phah Doctor la kumno kumno arsien shitaïew, ba kin leit ban incharge ïa katei ka jaka sumar, khnang ba kiba pang ba shitom na katei ka thaiñ khamtam ki longkmie kiba punkhun kin kham suk ban leit phah sumar bad ban shim dawai.
Halor katei ka mat ka seng kan sa leit ban ïakynduh ïa ka District Medical & Health Officer jong ka West Khasi Hills ha kine ki khyndiat sngi ban wan, na ka bynta ban pynsngew halor kitei ki jingdonkam bad ban buh ruh da ka jingthoh, khnang ba kan phah sha ka sorkar ba kan leh ïa kaba donkam, na ka bynta ka jingmyntoi jong ki paitbah nongshong shnong ha katei ka thaiñ.
