Shillong, Jymmang, 25: Ka Hynñiewtrep Youth’s Council (HYC) ha ka sngi Balang ka la aiti da ka dorkhas ha u Lat ka Jylla u Satya Pal Malik ban pynsngew ha kaba ïadei bad ka jingdawa ban ithuh noh ïa ka Niam Tynrai-Niam Tre kum ki niam ritpaid hapoh ka ri India hapoh ka Section 2 (c) jong ka Minorities Act, 1992.
“Ka Sorkar India haduh mynta ka dang ithuh tang ïa ki hynriew tylli ki kynhun niam, kata ka niam Muslim, Sikh, Buddhist, Parsi, Khristan bad Jain kum ki niam rit paid ha ri India hapoh ka Section 2(c) jong ka National Commision for Minorities Act, 1992,” ong ka seng ha ka dorkhas ba la aiti ha u Lat ka Jylla.
Ha ka jingïakynduh bad u Lat, ki nongïalam ka Seng ki la pynpaw ba ki dang don ki Khasi bad Jaiñtia kiba sah ha kane ka jylla Meghalaya, Assam bad ha kiwei kiwei de ki bynta jong ka ri kiba dang ksoh ha ka Niam Tynrai-Niam Tre. “Katkkum ka jingïoh jingtip jong ngi, ki briew kiba dang sah ha ka jingngeit tynrai ki don kumba lai lak ha baroh kawei ka ri India bad ki long ruh kiba dang sahdien ha ka ïoh ka kot bad ka shong ka sah bad kiba dang donkam bun ki jingïarap bad ka jingïada na ka Sorkar India bad na ki Sorkar Jylla,” ong ka Seng ha ka dorkhas.
“Khnang ban kyntiew ïa ki ha ka pule ka puthi bad ban ïoh ka kam ka jam, ka jingshah hikai pyntbit ban seng kam, ban ailad ïa ki na ka bynta ban ïoh bynta lem ïa ki jingmyntoi katkum ka riti synshar ka ri, ngi kyrpad ïa phi ba phin pynsngew ïa kane ka mat ha ka Sorkar India ban pynbna ïa ka ‘Niam Tynrai-Niam Tre’ kum kawei na ki niam ritpaid ha India katkum ka Act jong u snem 1992,” la pynpaw ka Seng.
“Ngi kyrpad ruh ïa phi ban ba phin pynsngew hakhmat ka ophis jong u Registrar General and Census Commisioner, Ministry of Home Affairs ka Sorkar India ba kan buh la ka jong ka phom kaba kdew ïa ki briew kiba dang ksoh ha ka niam tynrai hynrei ym ban ïa khleh lang bad kiwei pat ki jait niam khnang ba ka jingbun briew jong ki briew kiba dang bat ïa ka niam tynrai yn sa lah ban ïoh jingkheiñ ha ki sngi ki ban dang wan.
Lah ban pynkynmaw hangne, ha u snem 2020 ka Kong Delina Khongdup ka la leit tied ïa ka jingkhang jong ka Ingbishar Meghalaya High Court ban dawa jingithuh ïa kiba dang bat ïa ka niam Tynrai ne Niam Khasi bad ïa ki Hindu kum ki ritpaid.
Ha u snem 2019, ka Seng Khasi Kenmynsaw Synteiñ, Mawsynram ka la phah da ka jingthoh sha u Chairman jong ka National Commission for Minorities ban ai jingithuh noh ïa ka Niam Khasi kum ka kynhun niam rit paid ha ka ri India.
