Jowai, Nohprah 06: Ka Meghalaya Upper Primary School Teachers Association (MUPSTA), ha ka sngi Baar ka la rakhe ïa ka jingïaid lynti kaba 30 snem kynthih ban ai jingshakri bad ban peit ïa ka bha ka miat jong ki nonghikai kiba hikai ha ki skul Adhoc Upper Primary kiba don ha ka jylla baroh kawei.
Ha ka jingïalang kaba la long ha madan Khwang Ummulong West Jaiñtia Hills District la ïashim bynta lang da u Myntri ka tnat Pule Puthi ka Sorkar Jylla u Rakkam A. Sangma uba la long kum u Kongsan, u Adviser jong ka tnat Pule Puthi u Bah HM Shangpliang, ka MLA jong ka Sutnga Saipung Constituency ka Kong Santa Mary Shylla, u MDC ka Jowai North u Bah Brightstar Chyrmang, u President ka MUPSTA u Bah Kenneth Shadap bad ki nonghikai kiba la wan na kylleng ka ri Khasi-Jaiñtia bad Garo.
Haba kren kum Kongsan u Sangma u la ai mynsiem ïa ki nonghikai bad u la ai ka jingïaroh ïa ki nonghikai kiba haba hapoh ka shatri jong ka MUPSTA kiba la ai ka jingshakri la 30 snem kynthih.
U la ong ba ka Sorkar kan wad ki lad ki lynti ban kyntiew ïa ka jingsiew jong ki nonghikai skul Upper Primary ynda la ïoh ïa ka jingai jingmut na ka State Education Commission ba ka Sorkar ka la thung.
“Kumba ka long mynta ka Sorkar kam shym la shong klikti ban wad ïa ki lad ki lynti ban ai ka jingïarap ïa ki nonghikai,” u la ong bad bynrap, “watla ki skul ki dei kiba la pynïaid da ki riewshimet bad ki kynhun bapher bapher hynrei ka Sorkar ka la jingkyrshan ban kyntiew ïa ka pule ka puthi.”
U la ong kaba kongsan kum ki nonghikai ki dei ban shakri hok ïa ka kam khnang ban kyntiew ïa ka jingnang jingstad jong ki khynnah hapoh ka jylla Meghalaya. U la ong ruh ym tang ïa ki nonghikai hynrei ïa ki kmie ki kpa bad ïa ki nongmihkhmat jong ka jylla ki dei ban don ka jingïatreilang ha kaba ïadei bad ka jingkyntiew shajrong ïa ka jingnang jingstad.
Kumba long mynta ka jylla Meghalaya ka don ha trai duh ha ka pule puthi bad u Myntri u la kyrpad jur ïa ki nonghikai ba ki dei ban long kiba trei shitom khlem da buh ïa kata ka jingeh kaba ki don.
La pynphuh pynphieng ïa kane ka jingrakhe da ki jingrwai bad ki jingshad tynrai ba la ïa shim bynta da ki dkhot na ki District bapher bapher.
