Shillong Nohprah 19 : U Symbud Myntri Rangbah ka Jylla u Bah Prestone Tynsong ha ka sngi Palei u la hiar sha ka shnong Mawkhap ban leit pynhap pyrda ïa ka jingrakhe ïa ka Centenary Jubillee ne ka jingdap 100 snem jong ka Mawkhap Presbyterian LP School kawei na ki skul kaba la rim tam ha ka jylla kaba don ha Pynursla Constituency.
Ki bor pynïaid skul ki ïathuh ba ïa kane ka skul la seng ha u snem 1925 katta tang hadien 2 snem ba la wan poi ka A W Thomas ha kane ka shnong da ka jingthmu ban ai jingshai bad jingstad ïa ki briew kiba dang sahdum ha kitei ki por, khnang ba kin nang ban thoh bad pule bad ban sngewthuh ruh ïa ki jinghikai ka niam Khristan.
Na ka liang u Bah Prestone Tynsong haba kren ha ka jingïalang u la ai khublei ïa ki bor pynïaid jong ka skul bad ia ki nonghikai kiba la trei shitom haduh ban da kynjoh syndon 100 snem ha ka jingai jingshakri ban ai ïa ka jingnang jingstad ïa kane ka thain.
“Kum ka dak ban ïalehkmen lang ha kane ka jingrakhe dap 100 snem ka skul, nga pynbna ban ai jingïarap 10 lak tyngka ha u snem ban wan bad nga ieh ruh ha ka jingstad jong ki bor pynïaid skul ba kin pyndonkam ïa kane ka pisa ha kano kano ka bynta na ka bynta ban shna ïa ka iing skul ne ban shna ïa ka madan, ban kyntiew ïa ka bha ka miat jong ka skul bad ki khynnah skul,” la ong u Bah Prestone uba long ruh u MLA ka Pynursla.
Ha kaba ïadei bad ka khia ka shon ki paidbah namar ka jingbym don ïa ka surok namar ba ka shnong Mawkhap kadei kaba don ha ka jaka kaba long riat, u Bah Prestone ula pynbna ha ka jingïalang ban shna noh ïa ka surok ha ka jinglut kaban kot ïa ka 20 Klur bad ka jingshna ïa kane ka surok kan long tang kumba 2 Km tam hynrei namar ba ka jinglong jingman ka jaka rïat kumta ka jinglut ruh kan bun bha.
U Bah Prestone u la ai khublei ruh ïa ki bor pynïaid shnong kiba la kloi ban ai jaka ban shna ïa ka surok kaban pynïasoh syndon ruh bad ka shnong Nongjri Wahskong bad u la ong, shisien ba la dep shna ïa kane kan pynsuk ïa ki paidbah ban leit ban wan bad kan long ruh ka jingkyrkhu ïa kane ka thaiñ baroh kawei.
Ha shwa kane, u Bah Prestone u la ïaid da ka kjat ïa ki jaka riat kumba 15-20 minit eiei ban poi sha ka shnong Mawkhap ban ïashimbynta ha kane ka jingrakhe dap 100 snem ka skul.
Ha kane ka jingrakhe la ïoh ruh ïa ka jingkren na u MDC barim ka thain u Bah Ryngkatlang Lyndem kumjuh na u Bah Rahbok Tynsong, ki nongpynïaid jong ka skul, u Rangbah Shnong ha kaba la wan ban ïadonlang ki nongïalam ka Balang Presbyterian, ki nongïalam shnong, ki nonghikai, khynnah skul bad ki nongshong shnong ka Mawkhap bad na ki shnong kiba marjan.
La pynshongkun ïa kane ka jingrakhe da ki jingrwai bad ki jingshad kaba la ïashimbynta da ki khynnah pule kiba mynta bad ki samla pule kiba rim bad la plie ruh ïa u maw sah jingkynmaw jong kane ka jingrakhe ïa ka jingdap 100 snem kane ka skul.
