Shillong, Risaw 29: U Myntri ka Koit ka Khiah ka sorkar jylla u Bah Wailadmiki Shylla u la ong ba ka sorkar ka dang wad ki lad ki lynti ban pynbeit ïa ki jingsngewkhia kiba ïadei bad ki kam shakri ha ka 108, kaba mynta la pynïaid da ka National Health Mission (NHM).
Haba kren sha ki lad pathai khubor ha ka sngi baar, u Bah Shylla u la ong ba ka sorkar ka dang pyrshang ban wad ïa ki lad ki lynti ban pynbha ïa ka kam shakri, hynrei ka la ïakynduh ïa ki jingeh, ba kynthup ïa ki jyrwit jyrwat haba ïadei bad ka kam pisa pilaiñ.
“Shen ngin sa shong ka jingïalang bad ka sorkar ka dang wad ïa ki lad ki lynti ban pynbiang ïa ki jingshakri jong ki. Dang ha ka por ba la dep ngi la dep ban khot ïa ka tender hynrei ym don kiba biang bad ba bit. Ngi dang wad ïa ka lad ka lynti,” u la ong.
Haba kylli halor ka jingshimti noh ïa ka emergency service, u Bah Shylla u la ong ba ka sorkar ka kwah ha ka jingshisha, kumba long ka rukom, hynrei u la kdew pat ba ki don ki jingïaleh ba kynthup ïa ki jyrwit jyrwat ha ka kam pisa pilaiñ.
“Ka sorkar ka kwah shisha ban shimti hynrei ngi hap ruh ban sngewthuh bad ki don katto katne ki jingeh bad jingïaleh. Kam long kaba suk naba ka kam pisa ka long kaba kyllaiñ bha. Kumta ngi dang wad ki lad ki lynti kiba lah ban leh,” u la bynrap.
Haba kylli la ka sorkar kan sa khot biang ïa ka tender ban aiti ka jingtreikam ka emergency service, u Bah Shylla u la ong, “Kumba long mynta ngam lah ban ai kano kano ka jingkynthoh halor kane naba ngi khmih lynti ban don ka jingïakynduhlang. Shen ngin sa don ka jingïakynduhlang bad dei tang hangne ba ngin sa lah ban shim ka rai kaba shai halor kane ka kam.”
U Bah Shylla u khlem lah ban ai ïa ka por na ka bynta ban shim ïa ka rai halor kane ka kam, hynrei u la ong pat ba shen yn sa khot ïa ka jingïalang ban ïasyllok shuh shuh halor kane ka kam.
U khlem lah ruh ban ong eiei la yn mang biang ne em ban wanrah ïa ki ambulance ba thymmai, da kaba ong ba kam pat don ka jingpyntip sha u halor kane ka bynta.
Kumba long mynta, ka NHM ka dang pynïaid bha ïa ka jingtreikam ka emergency services, khlem pat ïoh satia ïa kino kino ki jingujor ne shah khñium.
