Shillong, K’lyngkot, 25: Ka Khun Hynñiewtrep National Awakening Movement (KHNAM) ha ka sngi Palei ka la phah da ka jingthoh sha ka Dorbar Shnong Rynjah ba kan pyndam noh mardor ïa ka kyntien “RR Colony” bad ban thoh bujli da ka kyrteng Them Rynjah.
“Na ka liang jong ka Hima Mylliem naduh u snem 2019 ka la kynthup ïa ka RR Colony lane kata ka Refugee Colony hapoh ka jingpynïaid jong ka Dorbar Shnong Rynjah bad ïa kane la pynskhem ruh da ka Khasi Hills Autonomous District Council (KHADC),” la ong u Working President ka KHNAM Bah Thomas Passah ha u kyrwoh.
“Ha kajuh ka por ka KHADC ka la pynduh ruh ïa ka kyrteng Refugee Colony lane RR Colony bad la jer da ka kyrteng tynrai ïa kane ka jaka kum ka “Them Rynjah”. Hynrei kaba sngewsih ka long ba haduh kine ki sngi bun bha ki Signboard kiba don ha kane ka jaka ki kdew beit da ka kyrteng “RR Colony” kaba long ka jingïalam bakla ïa kiba bun balang bad kaba pynïap ruh ïa ka jingbthah jong ka District Council,” la ong ka KHNAM.
Halor kane ka seng ka la phah ka shithi sha ka Dorbar Shnong Rynjah bad ka la kyrpad ruh ba kan pyndam ïa baroh kine ki jingthoh kyrteng ‘RR Colony” bad ban thoh bujli noh da ka kyrteng tynrai kumba dei, kata, “Them Rynjah” khnang ban lait na kano kano ka jingsngewthuh bakla.
“Ngi la pyntip ruh ïa kane sha ka KHADC bad ngi ap khmih lynti ba ynda ngi la ïaid lynti biang na kane ka jaka ngin ïohi noh ïa ka kyrteng tynrai,” la bynrap u kyrwoh.
