Shillong, Jymmang 13: Ka jylla Meghalaya ka dei na ki katto katne ki jylla kaba dang sahdien ha kaba ïadei bad ka jingpyntreikam ia ka skhim ban pyndait ïa ki smart meter.
Halor kane na ka liang jong u Myntri ka tnat bording ka sorkar jylla u AT Mondal, u la ïathuh ba ka daw kaba kongsan ka long ba katto katne ki kompeni kiba la ïashim bynta ha ka kam tender la shem ba ki don dak sniew sha kiwei pat ki jaka.
“Ngi la slem ban pyndep ïa ki kam khot tender jong ngi namar katto katne ki kompeni ki la ïoh ïa ki dak sniew ha kiwei ki jaka bad dangshen nga la wanrah ïa kane ka kam bad u Union Minister ka tnat Power ban pynpaw ba ngim tip ba ki don katto katne kiba la aplai ïa ki tender halor kane ka kam bad ngi la ïoh jingtip ruh ba ki don katto katne ki kompeni kiba la don dak sniew sha kiwei pat ki jaka,” u la ïathuh haba ïakren bad ki lad pathai khubor.
“U la pynthikna ba u Myntri ka sorkar pdeng u la bthah ba baroh kiba la don ïa ki dak sniew dei ban pyni ha ki lad pathai khubor kaba la pynwandur kyrpang na ka bynta kane ka jingthmu naba haba la leh ïa ki kam khot tender yn lah ban khmih bniah lyngba ki lad pathai khubor ba kine ki kompeni ki la shah buh dak sniew ne em,” u la bynrap.
Na ka liang jong u Myntri ka tnat bording u la pynthikna ba ka sorkar kan pynsngewthuh ïa baroh ki nongpyndonkam ba kin don ka jingshaniah ba ka jingpyntreikam ïa ki smart meter ha ka jylla kin long kiba ïaid beit ïaid ryntih.
Haba kylli u Mondal u la ong, “Haoid haba ngi leit ban pyntreikam ïa ki kam kiba thymmai ne ki technology bathymmai, kin don beit ki jingkulmar bad kane kam dei tang na ka bynta ka smart meter. Baroh ki jylla ki la ïaid shakhmat ban pyntreikam ïa ki smart meter. Kin don beit ki jingkhñium bad suki suki ïa kine pat la lah ban pynbeit bad dei halor kane ba la lah ban pyntreikam ïa ki smart meter. Ngi dei kawei na ki jylla kiba dang sahdien ha kaba ïadei bad ka jingpyntreikam bad ban pyndonkam ïa ki smart meter.”
