Dang pynkhreh ka Sorkar ban pynïoh jaka theh ñuit ha ki district bapher bapher: Sniawbhalang

Shillong, Lber 16: Ka sorkar jylla ka dang hapdeng ka jingpyrkhat kam ban pynïoh ïa ki jaka theh ñuit ha ki district bapher bapher jong ka jylla.
Ka jaka ha Nonghali kaba heh 112 acre la dep ban ithuh bad la dep ruh ban jied.
Ka sorkar jylla ka la ïadon bynta ruh bad ka Accredited Consultant for preparation of Environmental Impact Assessment (EIA)/Environmental Management Plan (EMP) bad ka jingdonkam ban ïoh ïa ka jingai jingbit ha kaba ïadei bad ka sawdong sawkun bad ka jingdonkam ban ïoh ïa ki jingdonkam haba ïadei bad ka jingbret ñuit kaba long katkum ka jingstad saïan ka ban ïarap ïa ka jingeh ha Shillong bad ki jaka ba khap sor.
Ka jinglong jingman hapoh ka jaka ha Nonghali kumba ka long mynta la nang sdang bad la pyndep ruh ïa ka jingleit jurip bad ka jingïoh ïa ka environmental clearance ka kam ka la nang ïaid.
Ïa kane la pyntip da u Symbud Myntri Rangbah ka jylla uba khmih ïa ka tnat Pynroi Sor u Bah Sniawbhalang Dhar haba jubab ha ka Dorbar Mang Tyngka kaba dang shukut shen.
Ha kaba ïadei pat bad ha Jowai, West Jaiñtia Hills, ïa ka jaka la dep ban ithuh ha Umalamat Elaka Jowai bad ka la don ruh ka jingkhmih bniah jong ka EIA/EMP, katba ha Tura, West Garo Hills, ïa ka jaka la dep ban ïoh kaba dei ha ka shnong Wakkagre bad ka jingkhmih bniah ka EIA/EMP ka la sdang bad kumjuh ruh ha Williamnagar ha East Garo Hills, ïa ka jaka la dep ban ïoh ha Rongakgre bad ka jingkhmih bniah na ka EIA/EMP ka la sdang.
Ha kaba ïadei pat bad ka Resulbelpara, North Garo Hills, Baghmara, South Garo Hills bad Nongstoiñ, West Khasi Hills, ka jingtyrwa ïa ka jaka la dep ban ïoh bad la bthah ba dei ban ai ïa ki kaiphod halor kane ka kam, bad ha Nongpoh, Ri Bhoi, la dep ban ïoh ïa ki jingtyrwa bad dep ruh ban pynlong ïa ka jingjurip da ka task force.
Shuh shuh ka jingithuh ïa ki jaka bad ka jingpynïaid ïa ka kam expression of interest ka la nang ïaid na ka bynta kiwei pat ki urban local body.
Ha kajuh ka por ka jingpynbha ïa ka jinglum ïa ki ñuit ki ñier ka la nang ïaid bad ka la pyndonkam da ki 71 tylli ki kali na ka bynta ka primary bad secondary ban lum ïa ki ñuit na ka bynta ka Shillong Municipal Board bad na ka bynta ki 37 tylli ki dorbar shnong ha Shillong Urban Agglomeration.
Ki la don haduh 51 tylli ki kali kit ñuit kiba trei ïa ki kam ha kiwei pat ki jaka sor ka Meghalaya.
Na ka liang ka tnat ka la tyrwa ruh ban dang donkam ban thied shuh shuh ïa ki kali kit ñuit ha ki jaka kiba donkam lyngba ka pisa na ka Finance Commission bad kiwei ki jylla ne ka jingïarap pisa na ka sorkar pdeng ka ban sa aiti shen sha ki jaka sor bapher bapher jong ka jylla Meghalaya.