Dang peitngor ka Sorkar ïa ka jinglong jingman ka Khappud ka thaiñ Pynursla-Bangladesh : CM

Shillong, Jylliew 26: U Myntri Rangbah ka Jylla Conrad K Sangma mynta ka Lah Sngi U Blei ula pyntip ba ka Sorkar Jylla ka la peit thuh bad peitngor bha ïa ka jinglong jingman ha khappud ka thaiñ Pynursla bad Bangladesh hadien ka jingther kuli sha suiñ da ki shipai BSF hynnin ka miet ha lad Umsyiem ban pynpra ïa ki riew paidbah.
Haba ïakren bad ki nongthoh khubor, u Conrad ula ong ba ka jinglong jingman hi ka la jai jai bad ka Sorkar ka dang peit thuh bha ïa ka jinglong jingman.
Ula ong ba kane ka jingjia ba jia hynnin ka miet, ka la jia hadien ba katto katne ki briew kiba donkti ha ki kam khaïi tuh, ki la shah pynpulom ka kam khaïi ha ki shipai BSF ka la lam pat sha ka jingïalum paidbad bad jingïalun maw sha ki BSF.
“Kum ka jingpynphai kylliang, ki shipai ki la siat 4 kuli sha suiñ hynrei ym sha ki briew. Ha kane ka jingkawang maw, ka la mih ka huri hura bad ki la don katto katne kiba mynsaw malu mala hynrei kam dei satia na ka jingdei kuli” ula ong.
Haba pyntip ba ka Sorkar kala phah tohkit ïa kane ka jingjia, u Myntri Rangbah ula ïai ban ba ki 4 kuli bala siat sha suiñ ka dei tang ban pyntieng ïa ki paidbah ban nym ïalum bad ong “Kumba nga ong, kane ka jingjia ka mih na ka kam khaïi tuh”.
Haba kylli halor ka jingpyrshah ki paidbah ïa ka jingdon ki BSF ha ki shnong briew, u Conrad ula ong ba ka Sorkar kan sa ïakren ïa kane ka kam lada don kino kino ki jingpynsngew na u paidbah.
“Hynrei kumba nga ong ba na ki kaiphod ba nga ïoh, ka dei ka kam ba don jingïadei bad ka jingkhaïi tuh bad namar bala ïoh bat da ki shipai bad ïoh kurup ïa ki mar, ka la mih kane ka jingïakawang maw bad bitor” ula ong.