Shillong, Risaw 04: U Myntri ka tnat Social Welfare ka jylla u Bah Paul Lyngdoh ha ka sngi Thohdieng u la pyntip ba ki la don kumba 7 tylli ki case kiba la khmih bniah na ka bynta ban pynhab ïa ki hapoh ka Prevention of Illicit Traffic in Narcotics Drugs and Psychotropic Substance (PITNDPS) Act, 1988.
“Ki la don 7 tylli ki case kiba mynta dang khmih bniah. Ngi kwah ban pynthikna ba ka jingtreikam ne system la leh ha kata ka lynti kumba ngi ju leh ïa ki homework da kaba phikir bad sumar khnang ba kine ki case kin ym lait sharud na ka daw ka jingduna ki sakhi bad kumta ter ter,” ong u Bah Lyngdoh sha ki lad pathai khubor.
Haba phai sha ka jingshah kem ka longkmie kaba la 50 snem ka rta ka Aisa Khatoon, kaba dei ka nongkhaïi drok kaba shyrkhei na Lower Paltan Bazar, u Bah Lyngdoh u la ong, “Ka jingjop bad ka lynti kaba kane ka Longkmie, kaba ngam lah ban khot ka kynthei, nga tharai ba kam donhok ban shah khot kum ka longkmie ne ka kynthei, naba ka la donkti ban die drok da kiba bun bun ki snem bad kaba la donkti ha ki 4 tylli ki 4 case, kaba ha kaba khatduh ka la shah kem noh, bad kane ka dei ka jingshim khia jong kane ka sorkar ba mynta, bad kane ka Khatoon ka don hapoh ka jingshah tohkit bad baroh ki kam la leh ban pynthikna ba kan shah pynngat ha ki kyndon jong ka preventive and detention, ba la don hapoh ka PIT NDPS.”
Shuh shuh u Myntri u la ong ba ka Shillong kan sa sakhi ïa ka jingmih jong kiba bun ki village defence parties (VDPs) ban ïakhun pyrshah ïa ka jingkynrei jong u drok.
“Ha ka jingshisha ha ka jingïalang bad ki Dorbar jong ka West Shillong kaba la long dangshen ki la aiti ïa ki jingai jingmut sha ngi bad ngi dang khmih ïa kine ki jingai jingmut bad phin ïohi haba kut jong une u snem kin sa mih bun ki VDP hapoh nongbah Shillong,” u la bynrap.
