Dang ïeng ki khyrdop khrong khajna ka JHADC, la khang lut ka KHADC

Shillong, Nohprah, 05: Namar ka jingbym hun ïa ka jubab RTI ba la ïoh na ka tnat Taxation jong ka Jaiñtia Hills Autonomous District Council (JHADC) ki arngut ki samla nongwad RTI ba kynthup ïa u Bah Wanbiang Mawa bad u Bah Joannes JTL Lamare ki la aiti da ka ujor sha ka ophis jong u Chief Secretary ka jylla u Bah DP Wahlang ban phah khang noh mardor ïa ki khyrdop khrong khajna jong ka District Council namarba kine ki long pyrshah ïa ki aiñ ki kyndon jong ka National Highway Authority of India (NHAI) bad ruh ïa ki kyndon jong ka Ministry of Road Transport and Highway (MoRTH).
“Lada ngi peit katkum ka jingthoh ba la pynmih da ka Ministry of Road Transport and Highways ha ka 26.06.2020 ka la kdew shai ba tang saw tylli la ai jingbit ban lum khajna ha ka surokbah National Highway, kata, tang ka Pahammawlien Toll Plaza, ka Diengpasoh Toll plaza, ka Pasyih Toll plaza bad ka Lumshnong Toll Plaza hynrei kaba lyngngoh ka long ba ki khyrdop khrong khajna jong ka Jaiñtia Hills Autonomous District Council (JHADC) ki dang ieng ban khrong pisa haduh mynta mynne hynrei ki khyrdop khrong khajna jong ka KHADC ki la khang lut,” ong kine ki samla ha u kyrwoh ba la phah sha u Mawphor ha ka sngi Palei.
“Kumta ha ka shithi ba la phah sha u Chief Secretary, ngi la kyrpad ba un shimkhia ban leh da ka tyngeh namar da ka jingdon jong kine ki khyrdop khrong khajna be-aiñ ha surokbah National Highway bad ka jingbun jong ki khyrdop khrong khajna ka la pynkiew dor shikatdeh eh ïa ki marbam mardih bad ka ktah ruh ïa ki longiing longsem baduk kiba im da ka kam bylla sngi,” ki la ong.
“Ngi dap da ka jingsngew lyngngoh ban ïohi ba kumno ka JHADC ka dang lah ban pynieng ïa kine ki khyrdop khrong khajna beaiñ haba ka KHADC ka lah khang naduh ba la pynmih hukum da ka NHAI haba ngi don ïa kajuh ka Sixth Schedule bad kajuh ka surokbah National Highway (NH-6),” ong kine ki arngut ki nongwad RTI.
“Ngi ki nongwad RTI shen ha kine ki sngi ban sa wan ngin phah da ka Legal Notice sha ki Ophisar ba dei peit ïa ka tnat hadien nangta ngin phah ujor da ka PIL hapoh ka Iingbishar Meghalaya High Court bad ngin phah tohkit ruh ha ka ophis jong u Lokayukta ïa ka pisa ba la ïohlum ka jah shaei haba ngi ïohi ha ki khubor ki nongtrei jong ka JHADC kim ïoh tulop da ki snem katba kiba ïoh pynïaid ki im sahuh, ki ïoh tei iingskul,” la kynnoh kine ki nongwad RTI.
“Kane ka la pynartatien ïa ngi, imat ka don kaei re kaei sha lyndet. Ai ba ki bor jong ka aiñ kan tohkit laitluid hangta kan paw pyrthei balei ba ki khyrdop khrong khajna beaiñ jong ka JHADC ki dang ieng khlem don jingsheptieng ïa ki bor jong ka aiñ,” ki la bynrap.
“Ngin sa ïai kyrpad ïa ki bor bahalor jong ka NHAI ban leh tyngeh da ka aiñ pyrshah ïa ka Jaiñtia Hills Autonomous District Council ba ka la leh palat shabar ka aiñ bad ki kyndon jong ka NHAI,” ki la ong shuh shuh.
“Ngin sa phah da ka jingthoh sha ki bor bahalor jong ka Ministry of Road Transport and Highways (MoRTH) ban pynshitom ïa ki ophisar bad ïa u Executive Member uba khmih ïa ki Non-Tribal Check Gate namarba kane ka long kumba khniot beiñ ïa ki trai kali bad ba kin pynphai baroh ïa ka pisa sha ka Ministry of Road Transport and Highways ba ki la ïohlum lajan dap hynriew snem mynta da kaba shim ar spah tam tyngka ïa ki kali kitmar ne kiba wan thylli,” la ong u Bah Mawa bad u Bah Lamare.