Shillong, Nohprah 10 : Ka Myntri ka Koit ka Khiah Kong Ampareen Lyngdoh ha ka sngi Thohdieng ka la ong ba ka sorkar ka dang ïa kynduh mawsiang ha kaba ïadei bad ka jingthungkam ïa ki doktor specialist ka dang long kaba eh bha ïa ka Jylla Meghalaya.
Haba ïakren bad ki nongthoh khubor, ka Kong Ampareen ka la ong ba ka jingduna ka dang bun bha haba phai sha ka jingdon ki doktor specialist bad ka jingdonkam ïa ki doktor specialist.
“Kumta, ka Sorkar Meghalaya ka la wanrah ïa ka sienjam da kaba phah ïa ki doktor ba la don lypa ba kin leit da ki certified programme khnang ba kin wan phai biang sha Jylla tang ha ka por ba lyngkot bad ban leit biang sha ki hospital ban ai ka jingshakri” kala ong.
Kat kum ka jingong jong ka, haduh mynta ka Sorkar Meghalaya ka la shim ïa ka sienjam kaba biang bha bad kaba seisoh ban lah pyndap ïa kane ka jingduna ki doktor specialist.
Haba ong ïa kane, ka Myntri ka la pynpaw pat ba ka Sorkar ka hap ban khmih biang ha ka ban ai kham bun ki jingmyntoi ïa ki doktor specialist ba kin wan trei hapoh ka Jylla Meghalaya wat hapdeng baroh ki jingeh khnang ba yn lah ban shakri ïa ki nongshong shnong bad ai ki jingsumar kiba paka.
