Shillong, Nailar 26 : U Myntri Rangbah u Conrad K Sangma ha ka Sngi Balang ula ong ba ka Sorkar Jylla ka dang ïai buddien bad ïakren bad ka Sorkar Pdeng ban ai jingmynjur noh ïa ka Meghalaya Residents, Safety and Security (Amendment) Bill, 2020 haba nang pynkhlaiñ ruh ïa ka jingpyntreikam ïa ka MRSSA, 2016 ba la don lypa.
Haba kren sha ki nongthoh khubor hadien ka jingïalang jong ka Kynhun Myntri, u Conrad ula ong “Shibun ki jingïakren ki la ïaid bad ngi kyrmen skhem ban ngin lah ban pynïaid shakhmat ia ka MRSSAB 2020 bad lah pyntreikam noh ïa ka. Ngi dang ap mynta namar ki dang don katto katne ki kam ba hap pynbeit”.
U ïathuh ba ki jingïalang ki la ïaid ha ka kyrdan jong u Myntri ka Sorkar Pdeng, u Home Secretary bad u Chief Secretary.
Halor ka Act ba mynta, u Conrad u ong ba ka Sorkar ka la nang pynïar ïa ka jingpynrung kyrteng ha ki Shnong bapher bapher da ka jingïarap ki Khlieh Nongsynshar.
“Ngi la leh ïa ka jingpynrung kyrteng ha kiba bun ki Shnong bad ki Rangbah Shnong ki la ïadon bynta lang. Ka jingpynïar ïa ka jingpynrung kyrteng kala nang jia katba ngi dang ïakren hangne” ula ong.
U Myntri Rangbah ula ong ba ka Sorkar ka la shna ïa ka Face Recognition Technology lyngba ki mobile ban weng ïa ki jingeh kiba don.
“Kan long kaba suk bha ïa ki Rangbah Shnong ban pyntrei ïa ka namar lah ban leh lyngba kano kano ka mobile. Lym kumta kan donkam ïa ka laptop, camera, data entry bad ka kamra. Ngi don haduh 6500 tylli ki Shnong, kumta ban ai ïa ki tiar ki tar sha baroh ki jaka ka long ka jingeh kaba khraw bha” ula ong.
Ula bynrap ba ki kam ki la nang ïaid ban pyndep bad pyntreikam ïa ki facilitation centre na ka bynta ki nong wanjngohkai, kaba dei shibynta jong ka Act 2016.
