Dang ïaid shaid shaid ka jingpynpra ïa ka skul barim ka St. Anthony’s LP School

Shillong, K’ Lyngkot 04: Ka jingpynpra ïa ka skul St. Anthony’s LP School kaba ha Meghalaya Shillong bad kaba la dap ruh kumba 123 snem ka jingdon kane ka jaka pule ka la nang ïaid shaid shaid bad ha kine ki sngi la ïohi ruh ba ki nongtrei ki la bun ki kam ban lied ïa ki tin bad ki lyntang kiba la tei ïa kane ka skul.
Lah ban ong ba kane ka skul kadei kaba la long kum kawei na ki jingtei ki ban pynsah ha ka khana pateng namar ka la dei ka jingtei kaba itynnad napdeng kiwei pat ki jingtei kiba la rim kiba don ha kane ka jylla. Ïa kane ka skul la sdang ban pynpra noh naduh u bnai Nohprah jong u snem 2024 hadien ba la kut baroh ki eksam hapoh kane ka skul.
Wat hapdeng ki jingsahnam jong ka kum kawei na ki jingtei hapoh ka khana pateng na kadaw ka jingitynnad hynrei na ki liang ki bor pynïaid skul kim banse ban ïaid shakhmat ban pynpra noh ïa kane ka jingtei kaba la rim tam ha ka jylla bad ban ïaid noh da ki jingtei katkum ka juk kaba mynta na ka daw jong ka jingdonkam ban ai ïa ki lad ai jingïada ïa ki khynnah skul.
Lah ban pynkynmaw dangshen na ka liang u Rev. Fr. Saji SJD, Director ka Don Bosco Technical School, u la ong ba kane ka jingshna kaba la rim tam yn bujli noh da ka jingtei kaba don kumba 4 mala bad ka ban pynwandur ruh katkum ka jingdonkam jong ka por bad kumjuh ruh ban lah ban dang pynrung khambun ki khynnah skul ha kane ka por kaba mynta.
Lah ruh ban ong ba ka Meghalaya Urban Development Authority ka la mynjur ïa kane ka jingpyrkhat ban tei ïa ka building ba thymmai.
“Kane ka jingtei kam lah shuh ban kynduh ïa ki kyrdan kiba long katkum ka jingtei kaba mynta. Haba phi don kumba 700 ne 800 ki khynnah skul, ka jingïada ka dei ban long ka kam kaba hakhmat eh nyngkong. Katba ngi dangpynïaid bad ka, ngin ym lah ban shah ba ki jingsngew kin long kordor palat ïa kaei kaba long ha madan,” u la ong.
Na ka liang ka bor pynïaid skul ka la shim bun ki lad ki lynti ban pynthikna ba ki jingpynlong ïa ki klas kin ïaid khlem ki jingshah pynthut ha baroh kine ki por ba dang ïaid ka jingpynpra bad ki bynta jong ki jingtei wat hapdeng ba ki mad ïa ki jingeh.
Kane ka ïing skul kaba la rim, ka don ïa ki klas naduh ki Nursery bad KG, bad ki klas ba 4 bad ki khynnah ba shong klas 5, bad kine ki kamra klas kin shah pynpra khnang ban ailad na ka bynta ki jingtei kiba thymmai.
U Fr. Saji u la pynpaw ruh ka jingsngewkhia haba ïadei bad ka jingduhnoh ïa kane ka jingtei kaba itynnad wat hapdeng ka jingdonkam ban ïaid lang bad ka jingsted ka por halor ki kam pynroi sor bad ki jingdonkam ban pynheh. U la ong, “Shisien ba ka jingtei kaba thymmai ka la ïeng bad kaba dei ruh kaba heh ki briew kin ym lah shuh ban ithuh ïa ka jaka ha kaba ka jingtei kaba rim ka don bad ka ïeng bad shen ruh kan sa long kaba ym poi pyrkhat ruh ban peit.”