Dang ïaibteng ka kam shalan dewïong beaiñ na Gasuapara sha Bangladesh, kynnoh u Krishan Kumar

Shillong, Ïaïong 27: Uwei u briew uba kyrteng u Krishan Kumar dang shen u la thoh sha u Justice (retired) BP Katakey, sha u Myntri Rangbah ka jylla u Conrad K Sangma bad sha u Chief Secretary ban ujor pyrshah ïa uwei u nongtih dewïong uba kyrteng u George S Marak, bad u la kynnoh ba u la ïai bteng ban khaiï bad shalan beaiñ ïa u dewïong na Gasuapara sha Bangladesh.
U Kumar ha ka jingujor u la kynnoh ba ïa u Marak la dep ban ai jingbit da ka sorkar jylla ban kit bad shalan ïa u dewïong uba don palat 25,000 ton uba la wanrah na Jharkhand bad ba ïa mynta la dei ban buh hapoh ki depot kiba don ha Goalpara, Assam bad ha Jadigittim bad Gasuapara.
U nongujor u la pynpaw ïa ka jingartatien halor ki jinglah ban pyndonkam da kaba ong ba ha baroh artylli ki jaka kata ha Jadigittim bad Gasuapara ki don tang mar kawei ka depot bad kim shym donkam ban don ki kot ki sla kiba kongsan napoh ka pollution control board ban pyntreikam ïa kane ka kam. Baroh ar, u la bynrap, ki dei ki jaka pynlang dewïong kiba rit bad kan long kaba eh ïa ki ban lum ïa kat utei u dewïong uba la bun ba la kdew haneng. Ki trok kit dewïong kiba la dei ban wanrah ïa une u marpoh khyndew sha Meghalaya la dei ban khmih lyngba ki GPS device hynrei ïa kane ki khlem leh bad na ka liang ka sorkar ruh ka la pulom ban pynshisha ïa ki jingtip ba bniah halor kane ka jingkit jong ki ïa u dewïong uba wan na Jharkhand, bynrap shuh shuh u Kumar ha ki jingkynnoh jong u.
U la pynpaw ka jingngeit ba kane ka jingai jingbit ka dei ka jingshisha ban ailad ïa u ban pynïaid ïa ka stock register jong u bad ban tih ïa u dewïong ba dang thymmai na Meghalaya kaba long beaiñ hadien ba la shah khang ka kam tih dewïong thliew khnai, bad ha kajuh ka por u la pynïaid ïa u marpoh khyndew da kaba kam ba u wan na Jharkhand.
La ong ba u Kumar u don da ka history haba pynmih ïa kine ki jingkynnoh pyrshah ïa u Marak. Ha u bnai Kyllalyngkot jong une u snem u la kam ba ka la don ka jingtih ïa u dewïong ba thymmai bad u la shalan da kaba kam ba u la wan na Nagaland tang ban ïoh ïaid lait na kane ka jingshah khang.
Kane ka jingkynnoh ka la pynlong ïa ka jingpyrshah ktien kaba jur bad ka jingkyntait kaba wan na u Marak, uba la kam kylla ba u Kumar bad uwei pat u briew ki la donkti ha ki kam dei ïa ki e-way bill sha kiwei pat ki nongshalan. Ïa kane baroh arngut mynta ki la shah tohkit ha ki bor pynïaid jong ka Meghalaya bad la khang ban shalan dewïong, bad halor kane u Marak u la thoh ruh sha u Chief Commissioner ka GST.