Dang i sangsot ka Nongshluid Government LP School wat ha ka jingïaid lynti ban dap 100 snem

Shillong, Nohprah, 11: Ka Nongshluid Government Lower Primary School, kawei na ki skul ba la rim bha ha ka thaiñ Mawsynram, kan rakhe ïa ka jingdap ba 100 snem ha ka 17 tarik u Nohprah 2022.
Hynrei wat ha ka jingïaid lynti ban dap 100 snem naduh ba la sdang ïa ka pynban ka long ka man naduh ka iing skul hi ka dang long kaba i sangsot haduh katta katta.
Ki bor pynïaid skul ki la pynpaw ba ha jingrakhe kan don ka jingplie ïa u mawnongrim ban pynsah jingkynmaw ïa u mawmer ka jingdap 100 snem bad kan don ruh ka jingrakhe leh kmen lypa ïa ka jingwan ka Khristmas mynta u snem da ki khynnah skul bad nongshong shnong nalor kiwei pat ki prokram.
Ka jingrakhe kan long ha ryngkat ka jingïatreilang bad jingïasnoh kti lang da ka School Managing Committee lem ka Dorbar Shnong Nongshluid.
Ka kyrwoh na u Secretary ka Managing Committee, kane ka skul ka dei kaba la seng naduh u snem 1920 ha kane ka shnong bad la wan hikai nyngkong eh da u wei u shipai Khasi ha ka por ka jingsynshar phareng na Sohra.
Kumta hapdeng kine ki 100 snem ka skul ka la ban ai jinghikai ïa ki khynnah bad la sngewthuh ba kane ka skul kan dei ka skul Sorkar kaba rim eh ha ki thain Mawsynram.
Kane ka skul ka la lah ban pynmih shibun ki samla pule kiba la kiew shaphrang ha ki kyrdan ba pher ba pher, ong ka kyrwoh kaba la wer ïa baroh naduh ki briew kiba la pass na kane ka skul bad baroh kiba la ïa don bynta ban wan sakhi lang ha katei ka sngi.