Shillong, Nailar 29: Wat lada ka thaiñ shatei lammihngi ka kham tam ïa ka national avarage ha ka liang ka koit ka khiah, hynrei ka jingpule bniah ïa ka koit ka khiah ha ki saw tyllli ki jylla jong kane ka thaiñ, kynthup ïa ka Meghalaya la lap ba ka don ka jingduna kaba khraw ha ka liang ki nongtrei ka koit ka khiah kiba ladep pyntbit.
Ïa kane la lap ha ka jingïalang ba shi sngi ba la pynlong da ka sorkar Meghalaya ryngkat ka jingïatreilang bad ka Centre of Budget and Policy Studies, Bengaluru haka 26 tarik mynta u bnai. Ha kane ka jingïalang la ïashim bynta da ki ophisar na ka tnad ka koit ka khiah na Meghalaya, Assam, Manipur, Mizoram bad Nagaland.
Kane ka jingïalang ka long ban ïakren halor ka jinglap jong ka Centre for Budget and Policy Studies kaba la wad bniah halor ka mat ‘Does the Northeast need a Public Health Cadre: A study of four Northeastern states’ kaba la pynlong ha u snem 2021.
Kane ka jingwad bniah ka la lap ruh ba kane ka thaiñ ka shaniah bun ha ka jingïarap na ka sorkar pdeng na ka bynta ka jingdonkam ha ka liang ka koit ka khiah lyngba ka National Health Mission. Nangta la lap ruh ba ki jaka ai jinghikai na ka bynta ki nongtrei ka koit ka khiah ruh ki duna shaba palat bad kiba bun ki kam la hap trei da ki Specialist.
Wat ki jaka pule na ka bynta ka Master in Public Health (MPH) ruh ki duna bha bad na kane ka jingwad bniah la lap ba na ki 105 tylli ki jaka pule ha ka MPH in India, ha ka thaiñ shatei mihngi ki don tang 4 tylli. Hynrei ka jingpule pat ka long kaba rem bha, ha kaba hap lut haduh 2.9 lak tyngka ha ki Private Institution bad 87 hajar tyngka ha ki Public Institution.
Na ka liang ka Meghalaya ka la pyntip ba katkum ka Health Policy ba la pyntreikam ha ka snem 2021, ka sorkar mynta ka phai khmat ban kyntiew ïa ka koit ka khiah da kaba ïatreilang bad ki shnong ki thaw bad ki paidbah lyngba ki Village Health Council.
