Nongstoiñ, Lber 31: Watla bun phew snem ym ju kham don shuh ki nongshong shnong hapoh West Khasi Hills kiba dang pyndonkam da ki kulai haba ki leit jingleit ha ki jaka ba jan ne jngai, hynrei ki dang don pat ki shnong haduh mynta mynne kiba dang shong da ki kulai ha ka leit ka wan.
U samla Naraïansingh Lyngkhoi 23 snem ka karta u la ong ba ki mih na ka shnong Siejlieh bad ki mut ban leit phai sha ka shnong Wahjynrew kaba dei ka jong ki kaba don ha ki thaiñ Byrki bad ka shim por kumba lai haduh saw kynta ei ei namar ba ka jngai bha bad ki hap ban ïaid na ki lynti ïaid kjat ym na ka surok.
U la ong ba naduh ba dang khynnah rit kim ju shong kali satia, hynrei ki sngew tynnad ban shong da ki kulai namar haba shong kulai ka long kum ka jingkilan met bad kaba kham sngew tynnad ka long ba ka jingmut jingpyrkhat ruh ka proh bha.
Nalor kata ki la ong ruh ba haba leit jingleit da u kulai ha ka por mynmiet, lada don kino kino ki riew sniew kiba ap thap ha lynti u kulai u la sngewthuh lypa bad u ai dak da kumne da kumtai khnang ba u ba shong un sngewthuh bad un kiar noh na sha kiwei pat ki jaka.
Ki la ong ruh ba ki kulai ki long kiba don kam haduh katta katta khamtam ha ki por lyiur haba ki jingtwa khyndew, dkut ki jingkieng bad ban ïaid da ki kali ym long shuh hynrei lada shong da u kulai pat lah ban kiar na kano kano kano ka jaka wat lada ka khohruh khohram ruh kumta ka la don kam ban pynkhie im biang ïa ka jingri kulai.
