Nongstoiñ, Naitung 24: Kiba bun ki shnong nongkyndong ha West Khasi Hills haduh kine ki sngi, ki dang pyndonkam ban kit jingkit da ki kulai na ki steshon kali ban pynpoi shaduh sha ki shnong ki thaw jong ki. Ka daw ka dei namar ka jingbym pat don ïa ki surok kali kiba biang kiba lah ban poi sha ki shnong ki jong ki. Ha kine ki khyndiat sngi ha ka jingleit jurip jong u nongthoh khubor jong ka Shlem ïa ki shnong ha ka thaiñ Ri Lyngngam, la lap ba ki dang don bun tylli ki shnong ha katei ka than ki bym pat don surok bad ïa ki marbam mar dih kum u khaw, shini, mluh bad kiwei kiwei la pynpoi sha ki shnong da kaba kit da ki kulai. Nalorkata la lap ruh ba ki don ki shnong kiba la don ki surok, hynrei tang shu wan u slap ki kali kim lah shuh ban ïaid, namar ka jingsniew ba palat liam.
Haba ïakren bad ki katto katne ki nongshong shnong, ki la ïathuh ba teng teng ki don ki kali kiba shu ïaid jubor, hynrei ki hap ban khreh lypa la ki nar lyngka, mohkhiew ban khyllie maw bad tih khyndew, na ka bynta ban pyndap ïa ki thliew ki syar tang ban pynpoi sha ki jaka ba ki mut ban leit buh bad pynpoi ïa ki mar bam mar dih bad kiwei kiwei.
