Dang buddien ka sorkar jylla na ka sorkar pdeng ban ïoh pyntreikam biang ïa ka skim ha khappud

Shillong, Rymphang 10 : U Myntri ba dei peit ïa ka tnad Border Area Development, Rakkam A Sangma ha ka sngi Nyngkong u la ong ba ka sorkar jylla ka la dep ban thoh sha ka sorkar pdeng ban kyrpad ba kan bteng biang ïa ki skim pynroi khappud ha ka jylla.
Haba kren sha ki lad pathai khubor, u Myntri u la ong ba ka prokram pynroi khappud ka la treikam ha ka jylla la katto katne snem hynrei naduh u snem 2021 ter ter ka sorkar India ka la pynsangeh noh ïa kane ka skim pynroi khappud.
“Ngi la ïakren bad kyrpad ïa ka sorkar pdeng ban pyntrei kam biang bad bteng ïa kane ka skim,” u la ong.
Katkum ka jingong jong u, katei ka skim pynroi khappud ka la ïarap shisha ban tei ïa ki jingtei ha khappud la ka long ki skul, ki hospital, ki surok bad ki jingkieng.
Shuh shuh u la ong pat ba mynta ki skim pynroi kiba ïadei hapdeng ki jylla kum ka jingshna ïa ki surok, community hall, iing skul bad kiwei kiwei ki dang bteng.
Haba jubab halor ka jingkylli, u Myntri ula ong ruh ba namar kadei ka skim jong ka sorkar India kumta, ka dei 90 na ka sorkar pdeng bad 10 persen pat hap ban bei na ka sorkar jylla.
Da kaba pyntip ba ka sorkar jylla ka dang ïai buddien na ka bynta ban ïoh biang ïa kane ka skim kam pynroi khappud, u Myntri u la pyntip pat bad ka scholarship na bynta ki samla pule ba dei na ki shnong khappud ka dang ïai bteng haduh mynta.