Dang bteng ki kali kit khia ban ïaid lyngba ka jingkieng Lailad, 15 sngi ai por ka RBPC ïa u DC

Nongpoh, Naiwieng 25: Ka jingnang bteng jong ki kali kit khia ban ïaid lyngba ka jingkieng Lailad kala buh ka jingsyier bad ka jingma kaba khraw ïa ki paidbah ba leit ba wan lyngba katei ka jingkieng kaba pynïasoh bad ki phew tylli ki shnong jong ka thaiñ Ri-Bhoi Sepngi watla ha katei ka jingkieng la thoh shai ba ki kali ba ïaid ki dei ban long tang kiba hapoh ka 9 MT, hynrei ki kali kit khia naduh ki trok ki dang bteng ban ïaid lyngba katei ka jingkieng kaba la rim bad don hapdeng ka jingma kaba khraw kaba lah ban kdiah ha kano kano ka por.
Kum ban shu kdew hangne na ka liang u District Magistrate ka Ri-Bhoi na ka por sha ka por la ju pynjari ïa ka kyndon aiñ 144 CrPC ban mana ïa ki kali kitkhia kiba palat ïa ka 9 ton ba kin ïaid lyngba katei ka jingkieng, hynrei manla ka miet ki trok kit khia naduh ki kali kit rnga, dieng bad kiwei kiwei kiba kit khia ki ju ïaid lyngba katei ka jingkieng ha kaba dang shen la sakhi ruh ba kawei ka trok kit rnga kala hap harud surok ha ki bynta jong u surok Umling-Patharkhmah, hynrei kumba long mynta la sakhi ba bun na ki trok kit palat pud ki dang pyrshang ban ïaid bad pynkheiñ aiñ lyngba u surok Umling-Patharkhmah khamtam ha ka por mynmiet ban shim kabu ruh na ka jingbha u surok naduh ba la dep ban siang rong khlem da kheiñ ïa ka jingma jong ka jingkieng Lailad.
Halor katei ka jingma jong ka jingkieng bad ka jingnang bteng ki kali kit khia ban ïaid lyngba u surok Patharkhmah-Umling, ka seng Ri-Bhoi People’s Council hapoh ka jingïalam jong u Samla Jayson Lennox Nongrum mynta ka sngi kala pynsngew biang sha u DC ba u dei ban shimkhia mardor ïa katei ka kam ban khanglad ïa ki kali kit khia ban ïaid lyngba katei ka jingkieng bad ai por ruh 15 sngi, lym kumta na ka liang ka seng kan sa shim pat da kiwei ki lad ki lynti kiba tyngeh, wat ban ap ha surok ban bat ïa ki kali kiba pynkheiñ aiñ.