Dang bishar bniah ka sorkar ban pynkylla biang ïa ka Mathematics kum ka Compulsory Subject ha ki skul

Shillong, Risaw 27 : U Myntri ka Pule Puthi u Rakkam A Sangma mynta ka sngi Thohdieng ula pyntip ba ka Sorkar jylla ka dang bishar bniah mynta la kan pynkylla biang ne em ïa ka subjek Mathematics kum ka Compulsory Subjek kumba long ha ki por mynshwa, ha baroh ki skul hapoh ka jylla bad halor kane shen kan sa shim ïa ka rai .
Haba iakren bad ki nongthoh khubor, u Rakkam Sangma ula ong ba ka jingïalang kaba la long bad ki Principal na palat 30-40 tylli ki secondary bad higher secondary school ki la ïatai sani bha halor katei ka mat.
Ula ong, kiba bun ki Principal ki la pynpaw ïa ka jingsngewkhia halor ki jingmih na ka jingai jinghikai bad ki la ai jingmut ba dei ban pynkylla noh ïa ki katto katne ki kot skul khang ba ki skul kin long lang kumjuh bad ka National Standard.
“Kiba bun ki pynpaw ba dei ban pynlong noh ïa ka Mathematics kum ka compulsory Subject, hynrei ïa mynta hi, ka sorkar kan sa shong pyrkhat ïa ki jingai jingmut jong ki Principal. Nga ruh nalade shimet nga sngew bad bun ki Academicians bad ki Principal ki la ai jingmut ba ïa ka mathematic ym dei shuh ban pynlong kum ka Optional Paper…ïa mynta ka dei ka “Best of Five” na ki 6 tylli ki subject. Kumta ka sorkar kan sa shim ïa ka rai hadien ba ka la dep ban khmih bniah bha” ong u Rakkam.
U Myntri ka pule puthi ula ong ba 90% na ki khynnah skul kim shim shuh ïa ka mathematics lada ki ïoh lad.
“Lada ngi ailad baroh kin kwah ban don ha ka jaka kaba suk bad kaba aram. ïa nga shimet hi, lada ngi ailad ba ka Mathematics kan dei ka Optional Paper, bun ki khynnah kim shim shuh ïa kane ka subjek, kane kan long kaba la thikna hynrei mynta ha kane ka juk kaba mynta, haba leit pule ha ki kyrdan kiba heh khlem ka mathematics kan long kaei kaei kaba lah ban pdiang hynrei nga tharai ba ngin lah ban pynkhreh bha, ngi don ïa kajuh ka jabieng bad kiwei pat kiba don ha kane ka sla pyrthei bad nga tharai kala poi ka por ba ngin khmih bniah bad ban shim ïa ka rai” ong u Myntri ka tnad pule puthi.
Ula pyntip ba ka tnad ka la bthah ïa ka Directorate of Educational Research and Training (DERT) ban leh ïa ka jingwad bniah halor ka jingleh bha ki khynnah pule hashwa ban pynlong ïa ka Mathematics kum ka Optional Paper.
“(Ngi kwah ban tip) haduh katno ngut ki khynnah ki la leh bha ha ka mathematics (shwa ban pynlong ïa ka kum ka Optional Paper) bad katno ngut ki khynnah ki bym shim ïa ka mathematics. Ngin sa ïoh ïa ki jingtip bad ki jingkheiñ baroh bad ngi la kyrpad ïa ka Meghalaya Board of School Education (MBOSE) bad ka DERT ba kan ai ia ki jingtip khnang ba ngin ïoh ïa ki jingtip kiba pura bad ban sngewthuh khambha halor kane ka mat” ula ong.