Dang ap ka Sorkar ban ai jingmynjur u Lat ïa ka Capt. W. Sangma Technical University Act
Shillong, Ïaïong, 12: U Myntri ka tnat Pule Puthi ka Sorkar Jylla u Rakkam A. Sangma ha ka sngi Balang u la ïathuh ba ka Sorkar Jylla ka dang ap ïa ka jingai jingmynjur jong u Lat ka Jylla halor ka Captain Williamson Sangma Technical University (Amendment) Bill, 2023 ba la mynjur da ka Iingdorbar Thawaiñ dang shen na ka bynta ban tei ïa ka State University.
“Ngi dang shu dep mynjur ïa ka Aiñ ha Iingdorbar Thawaiñ bad tang ai jingmynjur u Lat, ngin sa peit ïa ki kam kiba dei ban ïaid shakhmat bad ban pynsdang noh ïa ka State University kham kloi,” ong u Sangma ha ka jingïakren bad ki lad pathai khubor.
U laong ba ka jingïoh ïa ka state university hadien 50 snem ba la ïoh ïa la ka jong ka jylla ka la dei ka sienjam jong ka Sorkar sha uwei pat u mawmer.
Ïa ka Captain Williamson Sangma State University (Amendment) Act, 2023 la tyrwa ban wanrah ïa ka jingpynbeit thymmai ha ka Captain Williamson Sangma Technical University Act.
Ka jingthmu jong kane ka Aiñ ka long ban don la ka jong ka State University ka ban ai jinghikai ha ki jingpule kiba shalor bad ha ka Technical Education ha ka jingpule ïa ka Humanities, General Sciences, Engineering, Physical Sciences, Life Sciences, Commerce, Performing Arts, Professional Courses, Technology bad kiwei kiwei ki sobjek pule.
Nalor kata, yn ailad ruh ban leh Research bad ïa kiwei kiwei ki jingpule kiba katkum kane ka juk.
Haba kylli, u Myntri u la ong ba ka jingeh kaba ïadei bad ka CUET ruh yn sa lah ban weng noh mardor tang shu pyndep ïa ka jingpynsnoh ïa ki College bad ka State University.
“Ym tang ka jingeh ha ka CUET, hynrei kan long ruh na ka bynta ka jingmyntoi jong ki samla pule jong ngi. Hynrei na ka daw ki bym lah kiar, ngi hap ban pan jingbit ban pyllait noh shipor ban pynlong ïa ka eksamin CUET bad ngin ym lah ban shu pan shi pan ban pyllait na ka bynta ban pynlong ïa ka eksamin CUET. Namarkata, ngi hap ban wad ïa ki lad lynti na ka bynta ka jingmyntoi jong ki samla pule jong ngi,” u la bynrap.