Dang ap jubab ka Sorkar na ka Sorkar Pdeng ïa ka jaka ban pynkynriah ïa ki Harijan: Deputy CM

Shillong, Ïaïong 29: U Symbud Myntri Rangbah ka jylla uba khmih ïa ka tnat Kam Pohïing (Police) u Bah Prestone Tynsong ha ka sngi baar u la pyntip ba ka sorkar jylla ka dang ap ïa ka jubab napoh ka defence ministry halor ka jingkyrpad ban ai jaka na ka bynta ban pynkynriah ïa ki 342 tylli ki longïing ka Harijan colony na Them Ïew Mawlong.
Haba kren sha ki lad pathai khubor u Bah Tynsong u la ong ba ka jingïalang ba la pynïaid da ma u halor kane ka kam ka long kaba ym pat lah ban shim ïa ka rai.
“Kumba ka long mynta ka jingïalang ka long kaba ym pat lah ban shim ïa ka rai ne kaba ym pat thikna bad ngam lah ban ong ïaphi kaei kaba long shai,” u la bynrap.
Haba kylli, u Symbud Myntri Rangbah u la pyntip ba ha ka jingïalang la ïasyllok halor ka jingkyrpad ka sorkar ban ai ïa ka jaka jong ki shipai kaba khlem pyndonkam na ka bynta ban pynkynriah ïa ki longïing khar metor. Halor kane ka sorkar ka dang ap ïa ka jubab na ka defence ministry halor kane ka kam.
“Haoid ha ka jingshisha, ngi la ïakren ïa kane kam bad mynta ngi dang ap ïa ka jingai ktien na ka sorkar pdeng lyngba ka defence ministry naba ïa ka shithi la dep ban phah sha ka defence ministry bad ngi dang ap ïa ka jingaiktien na ki namar ha ka jingshisha, ngi la kyrpad ïa ka sorkar India lyngba ka defence ministry lada ki lah ban pynïoh ïa ngi ka jaka kaba la shu ieh khlem da la pyndonkam kaba dei ka jaka jong ki shipai,” u la pynpaw.
“Kumba long mynta u commissioner and secretary jong ka tnat Pynroi Sor u dang ïakren bad ka ministry of defence bad ngi kyrmen ba kin sa ïoh shen ïa ka jingai ktien na ka liang ka Ministry,” bynrap u Bah Tynsong.