Dang ap ïa ki nongïalam ba halor ha shwa ban weng kyrshan ïa ka EC NPP, ong u Bah Pala

Shillong, Nailar 26: U Nongïalam ka Congress u Bah Vincent H Pala ha ka sngi Nyngkong u la ong ba ka party ka dang ap ïa ka jingbthah jong ki nongïalam ba ha khlieh ka seng ne ka party high command ha kaba ïadei bad ka jingwengnoh ïa ka jingkyrshan jong ka seng ïa ka Executive Committee hapoh ka KHADC kaba la ïalam da ka National People’s Party (NPP).
Halor kane na ka liang u Bah Pala u la pynpaw ruh ïa kane ha ka jingïalang kaba la long dangshen jong ka party ha kaba bun na ki nongtrei jong ka party ki la pynpaw ïa ka jingdonkam jong ka party ba kadei ban wengnoh mardor ïa ka jingkyrshan ïa ka seng NPP kaba la ïalam ïa ka EC ha KHADC.
“Mynta ngi dang ap ïa ka jingbthah ka ban wan na Delhi,” u la ong da kaba bynrap, “Ngi ha ka seng kaba heh paid ne national party, ngim lah tang ban shu pynïasoh ne ban wengnoh ha kano kano ka por ba ngi kwah. Ngi donkam ban rai lano ngin wengnoh bad ngin hap ban ïoh ka jingmynjur na Delhi. Namar kata ngan leit sha Delhi ha kane ka taïew ban wan ban ïasyllok halor kane ka kam bad kaei kaba dei ban leh.”
Lah ban pynkynmaw ba ka Congress ka don satang arngut ki MDC kaba kynthup ïa u Bah Ronnie Lyngdoh uba dei ruh u MLA ka Mylliem bad u Bah Pynshngaiñlang N Syiem u MDC ka Mawkhar-Pynthorumkhrah ha ka ïing kaba don kumba 30 ngut ki dkhot hadien ba u Bah Charles Marngar bad u Bah Gabriel Wahlang ki la mihnoh na ka seng ban pynïasoh sha ka seng NPP.
Lah ruh ban ong ba u Bah Pynshngaiñlang mynta u dei u deputy chief executive member hapoh ka EC ba la ïalam da u Bah Pynïaid Sing Syiem.
U Bah Pala u la ong ba ka rai jong ka Congress ban kyrshan ïa ka EC ba la ïalam da ka NPP ha KHADC ka long halor ka nongrim jong ka jingdonkam ban ai jingmut ha kaba ïadei bad ka jingpynkylla ïa ka khyrnit kaba 6 jong ka riti synshar ka ri bad ka jingphiah ïa ki constituency ha shwa ka election MDC.
“Ngi shim ïa kane ka rai halor ka jingthmu kaba bha ban synniang na ka bynta ka jingpynthymmai ïa ka Sixth Schedule bad ngim lah ban shah ba tang ka NPP bad ka BJP ban batai halor kane ka kam. Ngi la mad ïa ki nongïalam kum u Bah Pynshngaiñ bad ka kynhun ki MLA ha kaba ngim lah ban shah tang ïa ka NPP bad BJP ban shim ïa ka rai. Kane ka jingthmu ban kyrshan ïa ka NPP ka long halor kane ka nongrim,” u la ong da kaba bynrap, “Ba ka jingphiah ïa ki constituency ka district council bad kiwei pat ki kam kiba donkam ïa ka jingnoh synniang ka jong ngi namar hato ka por ka la don ka jingïashrut hapdeng ka NPP bad ka UDP,” u la ong.