Nongpoh, Lber, 23: Ban wan rah ïa ka jingshngaiñ ha ka leit ka wan ki paidbah lyngba ka surokbah National Highway-6 ha Ri Bhoi, ba bunsien ki ju mih ki jingjia ba sngewsih tang na ka daw ka jingñiah khlem akor ïa ki Kali, ki Pulit Traffic ka Ri Bhoi ki la dang bteng ban bat ïa ki Kali ba pynkheiñ aiñ ha ryngkat ka kuna katkum ka Motor vehicles Act.
Kum ban pynkynmaw, Ki pulit Traffic na na ki Police Station ha Ri Bhoi, ki ju pynlong ïa ka jingbat ïa ki Kali kiba pynkheiñ aiñ na ka por sha ka por bad kane ka jingpyrkhing ka long naduh ki kali shimet, ki kali kamai paidbah, ki kali ar sha ka bad kynthup ruh wat ki kali heh ba ïaid lyngba ka surokbah National Highway-6 ha Ri Bhoi District.
Kane ka jingpyrkhing ïa ki kali ba pynkheiñ, ka dei ruh na ka bynta ka jingshngaiñ ki paidbah ba leit ba wan ha kane ka surokbah bad bunsien tang na ka daw ka jingbym burom ïa ki kyndon aiñ ka la ju wan rah ki jingjia ba sngewsih ba bun ki mynsiem ba kordor ki duh noh ïa la ka jingim.
Ki pulit Traffic ka Umsning Police Outpost hynnin ka janmiet jong ka sngi Saitjaiñ ki la pynlong ïa ka jingbat naphang ïa ki Kali ba pynkheiñ aiñ bad lyngba ka jingpynkheiñ aiñ ki la ïoh ban lum ïa ka kuna kaba Rs. 22,000 ka pisa bad Rs.32,500 ba la ai da ka challan bad haba kheiñ kyllum ki la ïoh ban daiñ kuna haduh Rs.54, 500.
Haba phai pat sha ki Pulit traffic na Nongpoh Police Station, hynnin ka sngi ki la bat ïa kiba bun ki Kali ba pynkheiñ aiñ bad ki la ïoh ban daiñ kuna haduh Rs. 11,500 da ka pisa bad kito kiba la shu ai da ka challan ka la poi haduh 30,000 ka kuna bad haba khein lang ka la poi T.41,500.
