Nongstoiñ, Nailur 8: Ki Pulit ka sor Nongstoiñ, mynta ka sngi ki la pynlong ïa ka jingjurip ïa ki dukan die jingdie kiba don marjan ki skul, kiba don kylleng ka sor Nongstoiñ, kaba long ruh kum shi bynta ban pynkynmaw biang ïa ki nongdie dukan, ba kin tip ba ka aiñ COTPA ne ka Cigarette and Other Tobacco Products (prohibition of Advertisement and Regulations of trade and commerce, Production, Supply and distribution Act 2003, ka khang pyrshah ban die ïa kino ki jingdih ne jingbam kiba pynsniew ne ktah ïa ka koit ka khiah ki khynnah skul kiba kynthup naduh u Kwai, biri, Cigarettes, Raja, Khaini, Rajniganda bad kiwei.
Ka la long ruh ka jingsah kynmaw ïa ka thaiñ hi baroh kawei, ba ki nongbuh dukan kin kyndit bynriew ba ïa kum kitei ki jingdih jingbam, ym ju long ban die ha marjan bad ki skul namar ki dei ban don 100 phut pajih na ki jaka pule.
Ïa katei ka jingleit jurip la lamkhmat da u bah K.Mawlong SI Nongstoiñ Police Station, ryngkat ka jingsynranlang ki battalion bad ki nongthoh khubor, kiba la sakhi lang ïa katei ka kam. Ha ka jingleit jurip, la lap ruh shibun ki dukan kiba la die ïa kitei ki mar kiba la maham, namar ka jingbym la tip ba la don ne pynjari lypa ïa katei ka aiñ.
Ki don haduh 29 tylli ki dukan ba shah ngat ha ka aiñ katkum ka section 6b jong ka COTPA Act. Ïa kitei ki dukan kiba la leh pyrshah la daiñ kuna noh mardor bad ka jinglum na ka jingdaiñ kuna ka poi kumba 1550 tyngka.
Kane ka kynhun jurip ka la leit sha kiba bun ki bynta ka sor Nongstoiñ kata kum hajan ba don ka St. Xavier Secondary School, Public School, Anderson Higher Secondary School, JJM Higher Secondary School, Sibsing Memorial Government Higher Secondary School bad kiwei kiwei.
